Эрон президенти Масъуд Пезешкиён Исроил махсус хизматлари томонидан унга қарши уюштирилган муваффақиятсиз суиқасд ҳақида маълум қилди. Бу ҳақда у америкалик журналист Такер Карлсонга берган интервьюсида маълумот берди.
Пезешкиённинг сўзларига кўра, қотилликка уриниш Эрон раҳбариятининг бошқа юқори мартабали вакиллари билан учрашув пайтида содир бўлган. Исроил учрашув ўтказилаётган жойга зарба беришга уринган. Сиёсатчи Қўшма Штатларни бу воқеага алоқадор эмас деб ҳисоблайди.
Ҳа, улар бу йўналишда ҳаракат қилди, аммо муваффақиятсизликка учради, деди Пезешкиён суиқасд борасида.
Журналистнинг АҚШ ҳудудида Эрон фуқароларидан иборат “уйқудаги ҳужайралар” мавжудми, деган саволига жавобан Пезешкиён бу Исроил томонидан одамлар онгига сингдирилаётган ёлғон ғоя эканини таъкидлади.
Сиз эронликлар бунга қодир, деган фикрни тарғиб қиляпсиз. Аммо бу мутлақо нотўғри. Чунки эронликлар табиатан тинчлик ва осойишталикка интилади, деди у.
Шунингдек, Пезешкиён олий раҳнамо Али Хоманаийнинг АҚШ сармоядорлари учун Эрон бозорига кириш бўйича ҳеч қандай тўсиқ йўқлиги ҳақидаги фикрини ҳам баён қилди.
АҚШ президенти Дональд Трамп минтақани ё тинчлик ва ёруғ келажак сари етаклайдиган, ёки уни абадий жарлик ва ботқоққа тортиб кетадиган инсондир. Бунинг учун у имкониятларга эга, деди Эрон президенти.
Сиёсатчи америкалик инвесторларнинг Эронда савдо, саноат ёки иқтисодий фаолият юритишига ҳеч нарса тўсқинлик қилмаслигини айтди.
Агар қандайдир чекловлар мавжуд бўлса ҳам, улар биз томондан эмас, балки АҚШ томонидан жорий этилган санкциялардан келиб чиқмоқда, дея таъкидлади у.
Изоҳ (0)