АҚШда Фаластинни қўллаб-қувватловчи талабалар ҳаракатининг етакчиси Маҳмуд Халил президент Дональд Трамп маъмуриятини судга берди. Бу ҳақда Al Arabiya хабар берди.
Халил иммиграция агентлари томонидан ҳибсга олингани ва ушлаб турилгани сабабли 20 миллион долларлик даъво аризаси киритган. У АҚШда доимий яшовчи резидент бўлиб, америкалик аёлга уйланган ва АҚШда туғилган ўғли бор. У март ойида ҳибсга олингач, маъмурий назорат остида сақланган.
Июнь ойида судья Халилни гаров эвазига озод қилишга қарор қилган. Шундан сўнг у Луизиана штатидаги федерал иммиграция қамоқхонасидан қўйиб юборилган. Даъво аризасида Трамп маъмурияти “Халилни ҳибсга олиш, ушлаб туриш ва депортация қилиш режасини атайлаб амалга оширгани, бу орқали унинг оиласини қўрқитиш мақсади кўзланганига” урғу берилган. Халил оғир руҳий зўриқиш, иқтисодий қийинчиликлар ва обрўсига путур етиши каби салбий оқибатларга дуч келган.
Жабрланувчи Колумбия университети битирувчиси бўлиб, Исроилнинг Ғазодаги ҳарбий ҳаракатларига қарши намойишларда фаол иштирок этган. Трамп маъмурияти уни “миллий хавфсизликка таҳдид” деб эълон қилган. Халил ушбу даъвони “жавобгарликка тортиш йўлидаги биринчи қадам” деб атаган.
Мендан тортиб олинган 104 кунни — рафиқамдан ажралиш, биринчи фарзандим туғилганида ёнида бўлмаслигимни — ҳеч нарса қайтара олмайди. Сиёсий қасос ва ваколатни суиистеъмол қилиш учун жавобгарлик бўлиши шарт, деган у даъвосида.
Халил илгари қамоқхонадаги “даҳшатли” тажрибаси ҳақида гапириб, у ерда 70 дан ортиқ эркак билан умумий хонада яшагани, шахсий ҳаёт бўлмагани ва чироқлар доим ёниқ турганини айтган.
Трамп маъмурияти Халилни ҳибсга олишда ўзининг қонуний ва конституциявий ваколатлари доирасида тўғри иш тутди. Худди зўравонликни тарғиб қилувчи, террорчиларни қўллаб-қувватловчи, яҳудийларга тазйиқ ўтказувчи ва мулкка зарар етказувчи ҳар қандай чет эллик фуқарога нисбатан қилинганидек, деган АҚШ Ички хавфсизлик вазирлиги котиби ёрдамчиси Трисия Маклафлин.
Трамп маъмурияти Халилнинг депортациясини “унинг АҚШда қолиши ташқи сиёсат учун жиддий салбий оқибатларга олиб келиши мумкин” деган асос билан оқлаган. Халилнинг ҳибсга олиниши Трампнинг сўнгги ойларда АҚШнинг нуфузли университетларига қарши олиб борган сиёсий кампанияси фонида содир бўлди.
Президент Колумбия, Гарвард ва бошқа олийгоҳларни хорижлик талабаларни қабул қилиш масаласида танқид қилган, федерал грантларни қисқартириш ва уларни аккредитациядан маҳрум қилиш билан таҳдид қилган. Халилнинг жамоаси унинг суд жараёнидан ташқари, қамоқдан ташқарида ҳам таҳдидларга дуч келиши мумкинлигидан хавотирда.
Изоҳ (0)