AQSHda Falastinni qo‘llab-quvvatlovchi talabalar harakatining yetakchisi Mahmud Xalil prezident Donald Tramp ma’muriyatini sudga berdi. Bu haqda Al Arabiya xabar berdi.
Xalil immigratsiya agentlari tomonidan hibsga olingani va ushlab turilgani sababli 20 million dollarlik da’vo arizasi kiritgan. U AQSHda doimiy yashovchi rezident bo‘lib, amerikalik ayolga uylangan va AQSHda tug‘ilgan o‘g‘li bor. U mart oyida hibsga olingach, ma’muriy nazorat ostida saqlangan.
Iyun oyida sudya Xalilni garov evaziga ozod qilishga qaror qilgan. Shundan so‘ng u Luiziana shtatidagi federal immigratsiya qamoqxonasidan qo‘yib yuborilgan. Da’vo arizasida Tramp ma’muriyati “Xalilni hibsga olish, ushlab turish va deportatsiya qilish rejasini ataylab amalga oshirgani, bu orqali uning oilasini qo‘rqitish maqsadi ko‘zlanganiga” urg‘u berilgan. Xalil og‘ir ruhiy zo‘riqish, iqtisodiy qiyinchiliklar va obro‘siga putur yetishi kabi salbiy oqibatlarga duch kelgan.
Jabrlanuvchi Kolumbiya universiteti bitiruvchisi bo‘lib, Isroilning G‘azodagi harbiy harakatlariga qarshi namoyishlarda faol ishtirok etgan. Tramp ma’muriyati uni “milliy xavfsizlikka tahdid” deb e’lon qilgan. Xalil ushbu da’voni “javobgarlikka tortish yo‘lidagi birinchi qadam” deb atagan.
Mendan tortib olingan 104 kunni — rafiqamdan ajralish, birinchi farzandim tug‘ilganida yonida bo‘lmasligimni — hech narsa qaytara olmaydi. Siyosiy qasos va vakolatni suiiste’mol qilish uchun javobgarlik bo‘lishi shart, degan u da’vosida.
Xalil ilgari qamoqxonadagi “dahshatli” tajribasi haqida gapirib, u yerda 70 dan ortiq erkak bilan umumiy xonada yashagani, shaxsiy hayot bo‘lmagani va chiroqlar doim yoniq turganini aytgan.
Tramp ma’muriyati Xalilni hibsga olishda o‘zining qonuniy va konstitutsiyaviy vakolatlari doirasida to‘g‘ri ish tutdi. Xuddi zo‘ravonlikni targ‘ib qiluvchi, terrorchilarni qo‘llab-quvvatlovchi, yahudiylarga tazyiq o‘tkazuvchi va mulkka zarar yetkazuvchi har qanday chet ellik fuqaroga nisbatan qilinganidek, degan AQSH Ichki xavfsizlik vazirligi kotibi yordamchisi Trisiya Maklaflin.
Tramp ma’muriyati Xalilning deportatsiyasini “uning AQSHda qolishi tashqi siyosat uchun jiddiy salbiy oqibatlarga olib kelishi mumkin” degan asos bilan oqlagan. Xalilning hibsga olinishi Trampning so‘nggi oylarda AQSHning nufuzli universitetlariga qarshi olib borgan siyosiy kampaniyasi fonida sodir bo‘ldi.
Prezident Kolumbiya, Garvard va boshqa oliygohlarni xorijlik talabalarni qabul qilish masalasida tanqid qilgan, federal grantlarni qisqartirish va ularni akkreditatsiyadan mahrum qilish bilan tahdid qilgan. Xalilning jamoasi uning sud jarayonidan tashqari, qamoqdan tashqarida ham tahdidlarga duch kelishi mumkinligidan xavotirda.
Izoh (0)