Непалда сўнгги бир ой ичида муссон ёмғирлари билан боғлиқ ҳодисаларда 30 дан ортиқ одам ҳаётдан кўз юмди, 150 киши жароҳатланди. Бу ҳақда Ҳинду газетаси хабар қилди.
Непалда май ойининг охирида ёмғирлар мавсуми бошланиши билан кучли ёғингарчилик оқибатида 674 та ҳодиса рўй берди. Мамлакатда сув тошқинлари, кўчкилар, чақмоқ уришлари, кучли шамоллар кузатилди. Натижада 31 киши ҳалок бўлди, яна 151 киши тан жароҳати олган, бир киши бедарак йўқолган.
Кўчкилар туфайли мамлакатнинг бир қатор ҳудудларида ўнлаб уйлар шикастланди ёки буткул вайрон бўлди. Иқтисодий зарар тахминан 2,5 миллион АҚШ долларига етди. Мамлакат қутқарув хизматлари жабрланганларга ёрдам кўрсатиш ва хавфли ҳудудлардан аҳолини кўчириш ишларини давом эттирмоқда. Непалда сув тошқинлари ва кўчкилардан зарар кўрган оилалар сони 1 мингдан ошиб кетди.
Непалда ёмғирлар мавсуми май ойининг охиридан сентябргача давом этади. Унинг авж нуқтаси июль ойига тўғри келади. Бу даврда мамлакатда йиллик ёғингарчилик миқдорининг 80 фоизга яқини ёғади. Ҳукумат вакиллари келгуси ҳафталарда кучли ёмғир ёғиши ва кўчкилар хавфи юқори эканлигини ҳисобга олиб, аҳолини эҳтиёт чораларини кўришга чақирди.
Бундан аввал Нигериянинг Нигер штатида жойлашган Моква савдо шаҳарчасида кучли ёмғирлар ва ундан кейин юз берган сув тошқини оқибатида камида 88 киши ҳалок бўлгани хабар қилинганди.
Май ойида Ҳиндистоннинг Уттар-Прадеш штатида момақалдироқли жала оқибатида камида 45 киши ҳаётдан кўз юмди.
Австралиянинг жануби-шарқида ёғган ёмғир қисқа муддатли тошқинларни келтириб чиқарган, кўплаб шаҳарларни ташқи дунёдан узиб қўйган ва аҳоли уй томларида жон сақлаётгани хабар қилинганди.
Изоҳ (0)