Ҳиндистон ҳамда Непалда сел келиши ва сув тошқинлари юз бериши оқибатида ҳалок бўлган одамлар сони камида 187 нафарга етганлиги маълум қилинди. Бу ҳақда Associated Press агентлиги хабар берди.
«Кўплаб уйлар вайрон бўлиб, деҳқончилик ҳосили сувга оққан, бу коронавирус пандемияси оқибатида шусиз ҳам оғир аҳволдаги аҳолининг турмуш кечиришини янада қийинлаштирди. Непал ва Ҳиндистонда пандемия ва иқлим ўзгаришлари оқибатида кузатилаётган табиий офатлар туфайли миллионлаб одамларнинг ҳаётига салбий таъсир кўрсатмоқда», — дейди Непалдаги Қизил ярим ой жамияти федерацияси вакили Азмат Улла.
Непалда 18 октябрь куни содир бўлган тошқинлар оқибатида камида 99 нафар одам ҳалок бўлган. Полиция 40 га яқин одам бедарак йўқолгани, 35 нафар жароҳатланган одам эса касалхоналарга етказилганини хабар қилган. Мамлакатнинг шарқий ва ғарбий ҳудудларида табиий офат сабаб ҳалок бўлганлар сони бошқа ерларга нисбатан кўп.
21 октябрда Непал бош вазири Баҳадур Деуба сув тошқинидан талафот етган ҳудудларга келган ва маҳаллий ҳукумат вакилларига одамларни қутқаришга, уларга тез тиббий ёрдам кўрсатишга эътибор қаратиш юзасидан топшириқлар берган.
Непал метеорологлари ҳафта охирида мамлакатда об-ҳаво янада ёмонлашиши кутилаётганини маълум қилган.
Қўшни Ҳиндистонда — Уттаракханд ва Керала штатларида кучли ёмғирлар 16 октябрдан буён давом этмоқда. Мазкур ҳудудларда камида 88 нафар одам ҳалок бўлган. Шунингдек, Ҳиндистонда йўллар сув остида қолган, кўприклар ва аҳоли хонадонлари вайрон бўлган. Яқин кунларда ушбу икки штат ҳудудида ҳам об-ҳаво ёмонлашиши ва ёмғирлар кучайиши кутилмоқда.
Аввал Хитойда сув тошқинлари туфайли қарийб 2 миллион киши эвакуация қилингани, кучли ёмғир туфайли Лондон кўчаларини сув босгани, Уммон ва Эронда 13 киши кучли циклон қурбони бўлгани ҳақида хабарлар берилган.
Шунингдек, август ойида Хитой ва Ҳиндистон кучли сув тошқинлари остида қолгани хабар қилинган.
Изоҳ (0)