Непалда коммунистик партия раҳбари мамлакатнинг янги бош вазирига айланди. Бу ҳақда Al Jazeera нашри хабар берди.
Манбада айтилишича, сўнгги сайлов жараёнларидан сўнг Хадга Прасад Шарма Оли бош вазирликка тайинланган. У мамлакатдаги икки йирик партия коалиция тузиши ортидан ҳокимиятга келган.
Непал президенти девони 14 июль куни махсус баёнот эълон қилган. Унда айтилишича 72 ёшли Шарма Оли тўртинчи муддатга лавозимига тайинланган.
Мамлакатни 18 ой давомида бошқариб келган собиқ раҳбар Пушпа Камал Даҳал сайловларда муваффақиятсизликка учраган. Ҳукуматда депутатлар ишончсизлиги кучайиши собиқ етакчининг фаолиятига якун ясаган.
Ҳукуматни эгаллаш учун етарли овозга эга бўлмаган Олининг Коммунистик партияси ва марказчи Конгресс партиялари коалиция шакллантирган. Эндиликда ҳукумат келишув асосида бошқарилиши хабар қилинган.
Ҳокимиятни тақсимлаш бўйича янги келишувга кўра, Оли ва Непал Конгресси партиясининг президенти, 78 ёшли Шер Баҳодур Деуба 2027 йилги умумий сайловга қадар бош вазир лавозимини бирга эгаллаб туришади.
Оли сиёсатга ўсмирлик чоғида кириб келган. Монархияни ағдариш кампаниясида қатнашгани учун 14 йил қамоқда ўтирган. 1987 йилда озодликка чиққанидан кейин коммунистик партия сафига қўшилган.
Шарма Оли биринчи марта 2015 йилда бош вазир этиб сайланган. 2018- ва 2021 йилларда у яна икки бор бош вазир бўлган.
Мамлакат аҳолиси янги ҳукуматдан кенг ислоҳотлар кутаётгани маълум қилинган. Чунки, мамлакатда турмуш даражаси ниҳоятда паст. 30 миллионга яқин аҳолиси бўлган Ҳимолай мамлакати коронавирус пандемиясининг туризм саноатига етказган зарарини ҳали ҳам қоплай олгани йўқ. Мамлакатда ўткир иқтисодий муаммолар етилиб қолган.
Непалнинг аввалги ҳукуматлари Ҳиндистон билан мустаҳкам алоқаларга эга бўлган. Коммунистик партиянинг ҳукуматга келиши эса мамлакатни Пекин билан боғлаши тахмин қилинган.
Изоҳ (0)