Бангладешдаги сув тошқинлари оқибатида 27 киши ҳалок бўлди

Бангладешдаги кучли ёғингарчилик оқибатида келиб чиққан сув тошқинлари оқибатида камида 27 киши ҳалок бўлди. Бу ҳақда «РИА Новости» хабар бермоқда.

Ўтган ҳафта охирида Ҳиндистон ва Непал қатори Бангладешга ҳам кучли ёмғирлар ёпирилди. Муссон ёмғирлари дарёларнинг ўзанидан чиқиб, тошишига сабаб бўлди.

Бангладешда табиий офат оқибатидаги ўлим ҳолатлари асосан шимолий ҳудудларда қайд этилган. Хусусан, Динажпур округида 13 киши, Куриграмда 11 киши, Лалмонирхатда эса уч киши ҳалок бўлган.

Мамлакат фавқулодда вазиятлар вазирлиги маълумотларига кўра, табиий офат Бангладешнинг 64 округидан 20 тасини қамраб олган, 370 минг киши вақтинчалик бошпаналарга жойлаштирилган.