Исроилдаги синагогада трибуна қулаши оқибатида 2 киши ҳалок бўлди, 200 дан ортиқ одам жабрланди (видео)

Қуддус яқинидаги Гиват-Зеэв манзилгоҳида жойлашган синагогадаги (яҳудийлар ибодатхонаси)  трибуна ибодат чоғида қулаб тушди, деб ёзади The Timeс of Israel.

Сўнгги маълумотларга кўра, ҳодиса оқибатида 219 киши жабрланди. Икки киши, шу жумладан, 12 ёшли бола ҳалок бўлди.

Исроилнинг KAN давлат телерадиокомпанияси ахбороти бўйича, 15 киши оғир аҳволда касалхоналарга етказилган. Қолганлар енгил жароҳатлар олган ёки ўртача оғир ҳолатда шифохонага олиб борилган.

KAN телеканали журналисти Сулаймон Маъсуд Twitter’га жойлаган видеода синагога трибунасининг юқори секцияси у ердаги одамлар билан бирга қулаши акс этган.

https://twitter.com/SuleimanMas1/status/1393966587099627522

Ҳодиса юз берган вақтда синагогада жами 650 киши бўлган, дея маълум қилди полиция. Улар Шавуот байрами учун йиғилган.

Гиват-Зеэв мерияси хабар қилишича, синагога охиригача қуриб битказилмаган бўлган.

Эслатиб ўтамиз, 30 апрелга ўтар кечаси Исроил шимолидаги Мерон тоғи яқинида Лаг ба-Омер диний фестивальи пайтида юзага келган тиқилинч оқибатида камида 44 киши ҳалок бўлиб, 100 дан ортиғи жароҳат олган эди.