Наманган вилоятида қариндошларининг пластик картаси орқали пора олган божхона инспекторига жиноят иши қўзғатилди.
Келтирилишича, ҳолат Коррупцияга қарши курашиш йўналишида Давлат хавфсизлик хизмати ходимлари томонидан олиб борилган тезкор-қидирув тадбирлари давомида аниқланган.
Наманган вилояти божхона бошқармаси “Учқўрғон” чегара божхона постининг божхона назорати ва расмийлаштирув гуруҳи инспектори фуқаронинг хориждан олиб келинган 57 дона iPhone 16 Pro Max телефон қурилмаларини Тошкент халқаро аэропортида ишловчи божхона ходими орқали IMEI-коди бўйича рўйхатдан ўтказиб бериш эвазига ҳар бир уяли алоқа воситаси учун 100 АҚШ долларидан, жами 5700 АҚШ доллари сўраган.
Бундан ташқари, у муқаддам фуқаро чет элдан декларацияда кўрсатмаган ҳолда кийим-кечакларни олиб келгани юзасидан чора кўрмагани эвазига 400 АҚШ доллари талаб қилади.
Инспектор жорий йилнинг 11 ва 14 июль кунлари сўралган пул маблағидан 900 АҚШ доллари ҳисобида 11 млн 317 минг сўмни ўзи ва қариндошига тегишли банк пластик карталарига ўтказдириб олади.
Аммо 16 июль куни у 1000 АҚШ доллари ҳисобида 12 млн 550 минг сўмни қариндошининг банк пластик картасига ўтказдириб олган вақтида ДХХ, Бош прокуратура ҳузуридаги департамент ҳамда Божхона қўмитаси ходимлари томонидан ашёвий далиллар билан ушланди.
Ҳолат юзасидан божхона инспекторига нисбатан Жиноят кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, қамоқ эҳтиёт чораси қўлланди. Тергов ҳаракатлари олиб борилмоқда.
9 июль куни Шароф Рашидов тумани ҳокими ва Гулистон шаҳар прокурори ўринбосари пора олаётганда ушлангани хабар қилинганди. 12 июлда эса Тошкент ва Фарғонада университетлар кафедра ўқитувчилари пора билан қўлга олинган. Мазкур ҳодисага олий таълим, фан ва инновациялар вазири Қўнғиротбой Шарипов муносабат билдириб, бу мутлақо кечирилмас ва кескин қораловга лойиқ ҳаракатлар эканини, бундай ноқонуний уринишлар бутун олий таълим тизимига доғ туширишини айтган.
Изоҳ (0)