Қирғизистон президенти Садир Жапаров мамлакатда рус тилини расмий мақомдан маҳрум қилиб бўлмаслигини ва бунинг сабабини маълум қилди. Бу ҳақда у “Кабар” агентлигига берган интервьюсида маълум қилди.
Жапаровнинг айтишича, россиялик ҳамкасби Владимир Путин рус тилини қўллаб-қувватлагани учун унга миннатдорлик билдирган.
Рус тили бизда Конституцияда расмий тил сифатида мустаҳкамланган. Айнан рус тилини қўллаб-қувватлагани учун Владимир Владимирович миннатдорчилик билдирди. Аслида рус тили бизга муҳтож эмас, биз унга муҳтожмиз. Биринчидан, рус тили дунёдаги олтита тилдан биридир. Иккинчидан, рус тилисиз Қирғизистондан узоққа кетолмаслигимизни унутмаслигимиз керак. Масалан, МДҲ давлатларини айтмай қўя қолай, қўшни давлатларни олайлик. Ўзбекистон ёки Тожикистонга борсангиз, рус тилисиз мулоқот қила олмайсиз.
Худди шу Европа, Америка, Хитойда рус таржимонларидан фойдаланишади. Сиёсатчиларнинг рус тили мақомини ўзгартириш таклифи нотўғри. Албатта, биринчи навбатда тилимизни ривожлантиришимиз керак. Лекин рус ва инглиз тилларини ҳам билишимиз керак. Дунёнинг ярми шу икки тилда гаплашади, деди сиёсатчи.
Садир Жапаров ҳозирда ёшлар 3-4 тилда гаплашаётганини қўшимча қилди. Унга кўра, кўп тил билиш яхши, чунки инсон дунёнинг қайси бурчагига бормасин, ўзини эркин ҳис қилади.
2 июль куни Жапаровни Кремлда Россия президенти Владимир Путин қабул қилди. Қирғизистон раҳбари ўз давлати Россия билан гуманитар алоқаларни ривожлантираётганини таъкидлади. Масалан, 43 га яқин мактабда Россиядан келган 200 нафар ўқитувчи ишлайди. Путин қирғизистонлик ҳамкасбига рус тилини қўллаб-қувватлагани учун миннатдорлик билдирди.
Аввалроқ Қирғизистон Конституциявий кенгаш аъзоси Садирдин Торалиев рус тилини расмий мақомдан маҳрум қилишни таклиф қилган эди. У ўз таклифини ёшлар ўз она тилида гаплашмай қўйгани билан изоҳлаганди.
Изоҳ (0)