Қирғизистонда масжид имомларига стипендия тўлаш бошланди. Бу ҳақда Мусулмонлар диний идораси хабар берди.
Стипендия диний сооҳа ходимларини қўллаб-қувватлаш ва диний соҳани мустаҳкамлаш мақсадида берилмоқда. Дастлабки босқичда имомлар ҳар ойда 8 минг сом миқдорида (91 доллардан ортиқ) маблағ олади.
Бугун биз тарихий қарорнинг гувоҳи бўлдик. Имом шунчаки намоз ўқийдиган одам эмас, балки жамиятнинг маънавий қўриқчиси, миллий онгни уйғотувчи раҳбардир. Унинг сўзи миллатнинг маънавий қиёфасини шакллантиради, панд-насиҳатлари тинчликни сақлайди, қарашлари эса ёшларга йўл кўрсатади. \
Агар имомга шароит яратиб берсак, у бутун жамият онгини шакллантиришга ёрдам беради. Имомни қўллаб-қувватласак, у халқ ишончини тўғри йўналишга йўналтиради. Бу қадам мамлакатимиз келажагининг маънавий пойдеворидир, деган Қирғизистон муфтийси Абдулазиз қори Зокиров.
Стипендиялар мамлакатнинг барча ҳудудларидаги масжидларда расман рўйхатдан ўтган имомларга тўланади. Қирғизистон мусулмонлари диний идораси бу уларнинг хайр-эҳсон ва ташқи ёрдамга қарамлигини камайтиришини маълум қилди.
Дастурнинг бошланиши ҳақида биринчи марта президент Садир Жапаров 2024 йил декабрь ойида бўлиб ўтган учинчи Халқ қурултойида маълум қилган эди. Ўшанда у 2025 йилнинг март ойидан бошлаб имомлар ойига 8 минг сомдан маош ола бошлашини, йил охирига келиб эса тўловлар миқдори 20 минг сомгача (салкам 229 доллар) оширилишини айтганди.
Кейинроқ президент “Кабар” агентлигига берган интервьюсида бу мақсадлар учун давлат бюджетидан маблағ сарфланмаслигини маълум қилган.
Изоҳ (0)