Францияда 1 июлдан бошлаб болалар борадиган барча очиқ жойларда — боғ, пляж, автобус бекатлари, мактабларнинг кириш жойлари ва спорт иншоотларида чекиш тақиқланди. Бу ҳақда CNN хабар берди.
Бу чора мамлакат президенти Эммануэл Макроннинг 2032 йилгача “биринчи тамакидан ҳоли авлод”ни яратиш ҳаракатининг бир қисми ҳисобланади. Жамоат жойларида қоидани бузиб, сигарет чекканлар, шу жумладан, сайёҳлар ҳам 90 евро жаримага тортилади. Агар 15 кун ичида жарима тўланмаса, ушбу миқдор 135 еврога ўзгаради.
Испания ва Италия каби давлатлар ҳам маълум ҳудудларда чекишга чеклов жорий этган. Аммо Франция пляжда чекишни тақиқлаган биринчи Европа давлати бўлди. Мамлакатнинг барча фуқаролари ҳам янги чорани қўллаб-қувватламаяпти.
Францияда тамаки истеъмол қилиш 1990 йиллардан бери камайган. Бугунги кунда мамлакатда вояга етганларнинг учдан бир қисми, катта ёшли аҳолининг эса 23 фоизи чекади. Бу ҳақда Франция миллий соғлиқни сақлаш агентлиги 2024 йилда ҳисобот берган. Ёшлар орасида ҳам тамаки истеъмоли камайиб бормоқда. 2022 йилда 17 ёшлиларнинг атиги 16 фоизи ҳар куни чекишини айтган. Бу миқдор 6 йил олдин 25 фоизни ташкил қилган.
Шунга қарамай, Франция Европанинг энг тамакига қарам мамлакатларидан бири бўлиб қолмоқда. Бу мамлакатга асосан Болгария, Туркия ва Жазоирдан контрабанда маҳсулотлари кириб келиши билан боғлиқ. Ўтказилган тадқиқотга кўра, 2024 йилнинг ўзида Францияда 18,7 миллиард ноқонуний сигарет истеъмол қилинган. Бу тамаки истеъмолининг 38 фоизини ташкил этади.
Изоҳ (0)