Мамлакатда қарийб 4,5 миллион чекувчи бор. Бу ҳақда “Тамакисоз” ассоциацияси раиси муовини Мухтор Ғаниев “Дарё” нашрига берган интервьюсида маълум қилди.
Мухтор Ғаниевнинг айтишича, чекувчилар сонини аниқлаш бўйича ўрганиш ўтказилган.
2022 йилда Қишлоқ хўжалиги вазирлигининг бир қатор илмий текшириш институтлари билан ҳамкорликда носвой ва сигарет масаласини ўрганиб чиқдик. Ҳисоб китобларга қараганда, Ўзбекистонда 4,5 миллион чекувчи бор. Шундан ярмидан кўпроғи — 2,4 миллион нафари сигарет чекади. Қолганлари (2,1 миллион нафари) носвой чекади.
Униси ҳам, буниси ҳам заҳар. Лекин таҳлил натижалари қўлбола носвойларнинг заҳари кўпроқ эканини кўрсатди. Унинг таркибида оғир металлар, хусусан, рух, стронсий ва бошқа заҳарли элементлар мавжуд. Улар оғиз бўшлиғи, жиғилдонга тушиши оқибатида саратон касаллигига олиб келади. Турли онкологик касалликлар келтириб чиқаради. Одамлар “почка”си, жигари “кетиб” қолибди, дейишади.
Кўпчилик у касаллик қандай келиб чиқишини билмайди. Шунинг учун айтган бўлардимки, сигарета ҳам, носвой ҳам истеъмол қилманг. Иккови ҳам инсон саломатлиги учун зарарли”,— деди мутахассис.
Олимлар чекиш таъсири остида организмда 25 дан ортиқ касалликлар ривожланиши кучайишини аниқлаган. Хусусан, ўпка саратони ва миокард инфарктининг чекиш билан боғлиқлиги ҳақида илмий далиллар мавжуд. Юрак-ишемик хасталиги ва инсултдан ўлим ҳолатларининг 70 фоизи чекувчи ҳамда спиртли ичимликлар ичувчи одамлар ҳиссасига тўғри келади.
Геморрой, сурункали гастрит, ошқозон ва ўн икки бармоқли ичак касалликлари келиб чиқишининг сабабларидан бири ҳам тамаки ва носвой чекиш билан боғлиқ. Ўрганишларга кўра, носвой истеъмол қиладиган эркакларда бепуштлик, оғиз ва милкларнинг яллиғланиши, милклар атрофияси, кариес каби касалликлар кузатилади.
Аввалроқ Ўзбекистонда 21 ёшга тўлмаган фуқароларга тамаки ва алкогол маҳсулотларини сотиш расман тақиқлангани хабар қилинганди.
Изоҳ (0)