Янги Зеландия ҳукумати келажак авлодлар учун тамаки маҳсулотларини сотиш ва етказиб беришни ноқонуний қилиш орқали чекишни тақиқлаш тўғрисидаги режаларини эълон қилди. Бу ҳақда Axios нашри хабар берди.
«Қонун кучга кирганида 14 ёшга тўлган шахслар учун қонуний равишда тамаки сотиб олиш имконсиз бўлади», — деди Янги Зеландия соғлиқни сақлаш вазирининг ўринбосари Айша Веррал чекишга қарши кураш бўйича ҳаракатлар режасининг бир қисми сифатида таклиф қилинган қонунни эълон қилиш чоғида.
«Улғайгани сари улар ва келажак авлодлар ҳеч қачон қонуний равишда тамаки сотиб ололмайди, чунки ҳақиқат шундаки, чекишни бошлаш учун хавфсиз бўлган ёш чегараси йўқ», — деди Веррал.
ССВ вакилининг сўзларига кўра, чекиш «Янги Зеландияда аслида олдини олса бўладиган ўлимнинг асосий сабабидир, шунингдек, у ҳар тўртинчи ҳолатда саратон касаллигини келтириб чиқаради».
Верралнинг аниқлик киритишича, тегишли қонун лойиҳаси 2022 йилда бош вазир Жасинда Ардерннинг кўпчилик ўринга эга бир партияли Лейбористлар партиясидан иборат парламентда тақдим этилади. Шундай қилиб, режага кўра, ёшга оид қоида келгуси йилда қабул қилинади. BBC News таъкидлаганидек, бу дегани 2008 йилдан кейин туғилганларнинг ҳаммаси бутун умри давомида тамаки маҳсулотларини сотиб ололмайди.
Бундан ташқари, сигарет сотишга рухсат берилган 8 мингга яқин дўконлар сонини 500 тагача қисқартириш режалаштирилган.
Axios қайд этишича, Янги Зеландия ҳукуматининг мақсади 2025 йилга бориб мамлакатда чекиш даражасини 5 фоизга камайтириш ва келажакда бу қарамликни бутунлай йўқ қилишдир.
BBC News маълумотларига кўра, ҳозирда Янги Зеландия аҳолисининг тахминан 13 фоизи чекади, бу ўн йил аввалгига нисбатан 5 фоизга кам. Шу билан бирга, мамлакатининг туб аҳолиси бўлган маори халқи орасида чекиш даражаси анча юқори — уларнинг 31 фоизга яқини чекувчи. Бу одамлар орасида касаллик ва ўлим кўрсаткичлари ҳам юқори.
Нашрнинг эслатишича, 2017 йилда мамлакат ҳукумати чекувчиларга тамакини ташлашга ёрдам бериш мақсадида электрон сигарет — вейплардан фойдаланишга рухсат берган. Соғлиқни сақлаш расмийларининг таъкидлашича, вейплар сигареталар каби зарарли эмас. Шу билан бирга, кўплаб мутахассислар тадқиқот жараёнида электрон сигаретлар учун ишлатиладиган суюқликларда хавфли ва саратонга олиб келадиган компонентлар борлигини аниқлаган.
Изоҳ (0)