Канадада чекиш хавфи ҳақида огоҳлантиришлар энди сигарета доналарининг ҳар бири устига босиб чиқарилади, деб эълон қилди мамлакат ҳукумати. Канада бундай амалиётни қўллайдиган дунёдаги биринчи давлат бўлади.
“Янги қоидалар Канада ҳукуматининг чекувчиларга бу одатни ташлашга ёрдам бериш, ёшларни ва тамаки истеъмол қилмайдиганларни никотин зараридан ҳимоя қилиш ва тамакининг жозибадорлигини янада камайтиришга қаратилган саъй-ҳаракатларининг бир қисмидир”, — дейилади ҳукумат хабарида.
Янги қоидалар 2023 йилнинг 1 августидан кучга киради ва босқичма-босқич жорий этилади: огоҳлантиришлар 2024 йил апрель ойининг охирида тамаки маҳсулотларида пайдо бўлади, июль ойига қадар катта ўлчамли сигареталарга, 2025 йилнинг апрелига қадар эса оддий сигареталарга босилади.
Сигаретада қандай ёзувлар бўлишига мисоллар кўрсатилди.
- “Тамаки тутуни болалар учун зарарли”;
- “Сигареталар саратонга олиб келади”;
- “Ҳар тортишда заҳар бор”.
2022 йил охирида Янги Зеландия ҳукумати 2009 йил 1 январь куни ва ундан кейин туғилган барча фуқароларга тамаки маҳсулотларини сотишни умрбод тақиқлаган эди. Янги Зеландия ҳукумати давлатни 2025 йилгача “чекишдан холи” мамлакатга айлантиришга интилмоқда.
Изоҳ (0)