Ўзбекистонда 8 июнь куни «Танлов сиздан: тамаки ёки соғлом ўпкалар» шиори остида оммавий тадбирлар ўтказилди. Бу ҳақда «Дарё»га Соғлиқни сақлаш вазирлиги матбуот хизмати маълум қилди.
Жойларда оилавий поликлиникалар томонидан маҳалла фуқаролик йиғинлари гузарлари, таълим муассасалари стадионларида ташкил этилган оммавий тадбирларда маҳаллий аҳоли вакиллари фаол иштирок этди.
Жумладан, ушбу оммавий тадбирлар доирасида пойтахтдаги Ғофур Ғулом номидаги маданият ва истироҳат боғида Соғлиқни сақлаш вазирлиги, ҳамкор ташкилотлар ҳамда аҳли иштирокида 5 километрга фаол юриш ва гимнастика машқлари уюштирилди. Шу билан бирга, «Саломатлик майдончаси», «Биз тамакисиз ҳудуд учун овоз берамиз» тадбирлари ҳам бўлиб ўтди.
Жаҳон соғлиқни сақлаш ташкилоти маълумотларига кўра, тамаки маҳсулоти ундан фойдаланувчи инсонларнинг ярмидан кўпининг ўлимига сабабчидир. Сигареталар дунё бўйлаб йилига қарийб 7 миллион одамнинг умрига зомин бўлмоқда. Уларнинг 6 миллиондан ортиғи кашандалар ва собиқ чекувчилар бўлса, 890 мингдан ортиғига тамаки тутуни сабаб.
Жаҳон соғлиқни сақлаш ташкилоти экспертларининг таъкидлашича, Ўзбекистонда ҳозирги кунда 2,8 миллион нафар кашандадан ярмида чекиш туфайли эрта ўлим хавфи мавжуд. Тамаки маҳсулотларига қарши фаолроқ чоралар кўрилмаса, бу рақам янада ортиши мумкин.
Изоҳ (0)