Fransiyada 1-iyuldan boshlab bolalar boradigan barcha ochiq joylarda — bog‘, plyaj, avtobus bekatlari, maktablarning kirish joylari va sport inshootlarida chekish taqiqlandi. Bu haqda CNN xabar berdi.
Bu chora mamlakat prezidenti Emmanuel Makronning 2032-yilgacha “birinchi tamakidan holi avlod”ni yaratish harakatining bir qismi hisoblanadi. Jamoat joylarida qoidani buzib, sigaret chekkanlar, shu jumladan, sayyohlar ham 90 yevro jarimaga tortiladi. Agar 15 kun ichida jarima to‘lanmasa, ushbu miqdor 135 yevroga o‘zgaradi.
Ispaniya va Italiya kabi davlatlar ham ma’lum hududlarda chekishga cheklov joriy etgan. Ammo Fransiya plyajda chekishni taqiqlagan birinchi Yevropa davlati bo‘ldi. Mamlakatning barcha fuqarolari ham yangi chorani qo‘llab-quvvatlamayapti.
Fransiyada tamaki iste’mol qilish 1990-yillardan beri kamaygan. Bugungi kunda mamlakatda voyaga yetganlarning uchdan bir qismi, katta yoshli aholining esa 23 foizi chekadi. Bu haqda Fransiya milliy sog‘liqni saqlash agentligi 2024-yilda hisobot bergan. Yoshlar orasida ham tamaki iste’moli kamayib bormoqda. 2022-yilda 17 yoshlilarning atigi 16 foizi har kuni chekishini aytgan. Bu miqdor 6 yil oldin 25 foizni tashkil qilgan.
Shunga qaramay, Fransiya Yevropaning eng tamakiga qaram mamlakatlaridan biri bo‘lib qolmoqda. Bu mamlakatga asosan Bolgariya, Turkiya va Jazoirdan kontrabanda mahsulotlari kirib kelishi bilan bog‘liq. O‘tkazilgan tadqiqotga ko‘ra, 2024-yilning o‘zida Fransiyada 18,7 milliard noqonuniy sigaret iste’mol qilingan. Bu tamaki iste’molining 38 foizini tashkil etadi.
Izoh (0)