Археологлар Перу шимолидаги Барранка провинциясида 3,5 минг йиллик қадимий шаҳар қолдиларини топди. Бу ҳақда BBC хабар берди.
Шаҳар номи Peñico деб аталган. У Тинч океанининг соҳилбўйи аҳолисини Анд тоғлари ва Амазонка ҳавзасида яшовчилар билан боғлайдиган асосий савдо маркази бўлган.
Перу пойтахти Лимадан 200 км шимолда жойлашган бу шаҳар денгиз сатҳидан тахминан 600 метр баландликда қурилган. Унга милоддан аввалги 1800 ва 1500 йиллар орасида асос солинган деб тахмин қилинмоқда. Ўша даврда Яқин Шарқ ва Осиёда дастлабки цивилизациялар гуллаб-яшнаган. Тадқиқотчиларнинг таъкидлашича, кашфиёт Американинг энг қадимги цивилизацияси — Карал шаҳрининг тақдирига ойдинлик киритади.
Тақдим этилган дрон тасвирларида тош ва лойдан қурилган бинолар қолдиқлари акс этган. Ҳудудда 8 йил давомида олиб борилган тадқиқотлар натижасида 18 та иншоот, жумладан, маросим ибодатхоналари ва турар жой мажмуалари топилган. Биноларда тадқиқотчилар маросим буюмлари, одам ва ҳайвонларнинг лойдан ясалган ҳайкаллари, мунчоқ ва денгиз чиғаноқларидан ясалган маржонларга дуч келган.
Peñico Америка қитъасидаги энг қадимги цивилизация сифатида тан олинган Карал яқинида жойлашган. Карал Перунинг Супе водийсидаги 5 минг йиллик цивилизация саналади.
Каралда 32 та ёдгорлик, жумладан, йирик пирамида иншоотлари, мураккаб суғорма деҳқончилик ва шаҳар манзилгоҳлари мавжуд. У Ҳиндистон, Миср, Шумер ва Хитойдаги бошқа қиёсий цивилизациялардан алоҳида ривожланган деб ишонилади.
Археолог Рут Шеди Peñico ва Карал қазишмалари бўйича сўнгги тадқиқотларга раҳбарлик қилган. Унинг айтишича, топилма Карал цивилизацияси тақдири ҳақида муҳим маълумотлар тақдим этади.
“Пеñиcо соҳилбўйи, тоғли ҳудудлар ва ўрмон аҳолиси билан савдони амалга оширувчи стратегик ҳудудда жойлашган”, деди доктор Шеди.
Перуда Американинг кўплаб энг муҳим археологик топилмалари, жумладан, Анд тоғларида Мачу-Пикчунинг Инка қалъаси ва тошга ўйилган сирли Назча чизиқлари топилган.
Изоҳ (0)