“Барселона” “Манчестер Юнайтед” ҳужумчисини сотиб олиш ниятида

“Барселона” ёзги трансфер ойнаси ёпилгунга қадар чап қанот ҳужумчисини сотиб олиши мумкин.

Журналист Алберт Фернандеснинг ижтимоий тармоқларда ёзишича, Каталония клуби бош мураббийи Ханс-Дитер Флик “Барса” раҳбариятидан “Манчестер Юнайтед” клубидан Маркус Рэшфордни ҳужум чизиғига қўшиб олишни сўраган.

2022/2023 йилги мавсумда англиялик ҳужумчи барча турнирларда 56 та ўйин ўтказиб, 30 та гол урди ва 10 та голли узатмани амалга оширди. Ўтган мавсумда Рэшфорд барча мусобақаларда 43 та ўйинда қатнашиб, саккизта гол ва бешта голли узатмани амалга оширган.

Футболчининг клуб билан амалдаги меҳнат шартномаси 2028 йилнинг ёзига қадар амал қилади. Transfermarkt порталида берилган маълумотларга кўра, футболчининг бозор қиймати 60 миллион еврони ташкил қилади.