Андижон вилояти Хўжаобод туманида профилактика инспектори маст фуқаро пичоқлашидан вафот этди. Бу ҳақда ИИВ матбуот хизмати хабар берди.
Маълум қилинишича, 1 июль куни соат 20:50 ларда Андижон вилояти Хўжаобод тумани “Юксалиш” маҳалласидаги хонадонда жанжал бўлаётгани ҳақида 102 қисқа рақамига келиб тушган хабар бўйича ҳудуд профилактика инспектори — катта лейтенант А.Абдувалиев маҳалла раиси А.Маматалиев билан бирга воқеа жойига етиб борган.
1960 йилда туғилган фуқаро Юнусали Холбозоров маст ҳолда ўз оила аъзоларига хўжалик пичоғи билан таҳдид солаётган бўлган. Уни зарарсизлантириш жараёнида фуқаро қўлидаги пичоқ билан ходимнинг кўкрак қисмига зарба бериб, оғир тан жароҳати етказган. Олган жароҳати натижасида кўрсатилган ёрдамга қарамасдан, А.Абдувалиев шифохонага олиб кетилаётган вақтида вафот этган.
Ҳолат юзасидан Жиноят кодексининг 97-моддаси 2-қисми “г” банди (ўз хизмат ёки фуқаролик бурчини бажариши муносабати билан шахсни қасддан ўлдириш) билан жиноят иши қўзғатилган.
Ҳозирда гумондор воқеа жойидан яширинган, уни аниқлаш ва қўлга олиш бўйича тезкор қидирув тадбирлари амалга оширилмоқда.
ИИВ ушбу шахс ҳақида бирор-бир маълумотга эга фуқаролардан зудлик билан яқин орадаги ички ишлар органларига ёки 102 қисқа рақамига мурожаат қилишни сўради. Маълумот берган фуқаронинг шахси сир сақланиши кафолатланади.
Жиноят кодексига кўра, ўз хизмат ёки фуқаролик бурчини бажариши муносабати билан шахсни қасддан ўлдириш 15 йилдан 25 йилгача озодликдан маҳрум қилиш ёки умрбод озодликдан маҳрум қилиш жазоси билан жазоланади.
21 июнь куни Тошкентда фуқаро инспекторга пичоқ билан тажовуз қилганди. Фуқаролар жанжали вақтида жиноятни содир этган шахсни ушлаш чораларини кўраётган профилактика инспекторига пичоқ билан тажовуз қилинган.
Изоҳ (0)