Уйқу билан боғлиқ муаммолар рашк ҳиссини кучайтириши, айниқса, хавотирли боғланиш турига эга одамларда романтик муносабатлардаги ишончни пасайтириши мумкин. Монтана штати университети тадқиқотчилари шундай хулосага келишди. Тадқиқот натижалари Уйқу бўйича ассоциациялашган профессионал жамиятлар (APSС)нинг Sleep 2025 конференциясида тақдим этилган.
Маълум қилинишича, тадқиқотда 68 нафар ёш иштирок этиб, улар икки ҳафта давомида ҳар куни ўзларининг ҳиссий ҳолати, хулқ-атвори ва уйқу сифатини баҳоловчи сўровномаларни тўлдиришган. Қўшимча равишда, иштирокчилар боғланиш услуби бўйича сўровномадан ўтган.
Маълумотлар таҳлили шуни кўрсатдики, хавотирли боғланиш — муносабатларда ишончсизликка мойиллик ва рад этилишдан қўрқиш — уйқу сифатининг пастлиги билан боғлиқ экан. Бундан ташқари, айнан шундай иштирокчиларда ёмон уйқудан сўнг эрталаб рашк ҳисси кўринишидаги кучайган реакция кузатилган. Бошқа боғланиш услубига эга бўлган одамларда бу таъсир яққол намоён бўлмаган.
“Қизиқ жойи шундаки, ёмон уйқу ҳар доим ҳам салбий ҳис-туйғуларни келтириб чиқармади. Ҳаммаси индивидуал хусусиятларга боғлиқ эди”, деди тадқиқотнинг етакчи муаллифи, Монтана штати университети докторанти Жованни Алварадо.
Мутахассисларнинг эслатишича, сифатли уйқу — психоэмоционал саломатлик асоси ҳисобланади.
Америка Уйқу тиббиёти академияси (ААSМ) маълумотларига кўра, катталарга кунига камида етти соат ухлаш тавсия этилади. Бунда нафақат миқдор, балки уйқунинг мунтазамлиги, узлуксизлиги ва қулайлиги ҳам муҳим аҳамиятга эга.
Изоҳ (0)