Жиноят ишлари бўйича Қашқадарё вилоят суди тарғибот бўлими бошлиғи Жўшқин Йўлдошевнинг «Дарё»га маълум қилишича, 2018 йил 8 март куни Китоб туманида 18 ёшли келинчак томонидан содир этилган жиноят иши 2018 йил 6 сентябрь куни судья Фозил Юсупов раислигида кўриб чиқилган.
Суд ишини кўриб чиқиш давомида аниқланишича, воқеа 2018 йил 7 март кунидан 8 мартга ўтар кечаси соат 00:30 да содир бўлган.
2000 йилда туғилган судланувчи Муниса Нуриллаева судда марҳум турмуш ўртоғи 1991 йилда туғилган Мирзоҳид Қулмуродов уни севмаслигини, ота-онасининг қистовига кўра унга уйланганини кўп маротаба такрорлаганини айтган. Нуриллаеванинг судда қўшимча қилишича, марҳум турмуш ўртоғи бошқа қизни севишини ҳам кўп маротаба такрорлаган.
Аниқланишича, судланувчи Муниса Нуриллаева ҳамда марҳум Мирзоҳид Қулмуродовнинг тўйи қотиллик содир бўлишидан 12 кун илгари 2018 йил 24 февраль куни бўлиб ўтган.
Воқеа гувоҳларининг судда айтишича, 7 март куни оила аъзолари кечки овқатни бирга ейишгач, Муниса Нуриллаева ҳамда турмуш ўртоғи Мирзоҳид Қулмуродов ўзларига тегишли хонага кириб кетган.
Сўнгра кечаси соат 00:30 ларда келин бақириб, ҳаммани ёрдамга чақирган. Биринчи бўлиб хонага кирган қайнотасига ўғли ўрнидан турмаётганини айтган.
Судгача бўлган тергов жараёнларида Муниса Нуриллаева турмуш ўртоғини рашк туфайли ўзи ўлдириб қўйганини айтган бўлса, судда турмуш ўртоғи ўзини ўзи сим билан бўғиб ўлдирганини билдирган. Қашқадарё вилоят суд-тиббий экспертиза бюроси эксперти Ғ.Якубов суд мажлисида марҳум ўзини-ўзи бўғиб ўлдирмаганлигини, чунки унинг бўйин соҳасидаги жароҳати айлана шаклда эмаслигини, жароҳат бўйиннинг олд қисмидан ўртага қадар эканлигини, бундай ҳолатда марҳум ўзини-ўзи буғиб ўлдирган деб бўлмаслигини айтган. Шунингдек, мутахассис Мирзоҳид Қулмуродовнинг ички аъзоларидан заҳар ва уйқу дори чиқмаганлигини, ўша куни Мирзоҳид Қулмуродов ухлаган ҳолда ёки бошқача тарзда уйқу дори, заҳардан маст ҳолда бўлган бўлиши мумкинлигини айтган. Ғ.Якубовга кўра, инсон бўғилганда қаршилик кўрсатиши керак. Ушбу ҳолатда марҳум умуман қаршилик кўрсатмагани аниқланган.
Суд тергов хулосалари ва гувоҳларнинг берган кўрсатмасига асосланиб, судланувчига Жиноят кодекси 97-моддаси 2-қисмининг «в» банди (айбдорга аён бўлган ожиз аҳволдаги шахсни қасддан ўлдириш) билан ЖКнинг 85-моддасига асосан 9 йил озодликдан маҳрум қилиш жазоси тайинлаган.
Судда шунингдек, Муниса Нуриллаевага 2017 йил декабрь ойида қўшнисининг телефонини ўғирлагани учун ҳам Жиноят кодексининг 169-моддаси 1-қисми билан айб қўйилиб, энг кам иш ҳақининг 3 баравари — 516 720 сўм миқдорда жарима жазоси ҳам тайинланган.
Изоҳ (0)