Қорақалпоғистоннинг Хўжайли туманида она ўз фарзандларига зулм ўтказиб, уларни хўрлаб келгани, воқеадан жамоатчилик хабар топгач, ҳолат юзасидан жиноят иши қўзғатилгани ҳақида хабар берилганди.
«Орадан тўрт ой ўтиб, фарзандларини хўрлаган аёлга суд ҳукми ўқилди», дея хабар берди «Дарё» манбаси.
Айтилишича, суд жорий йилнинг 29 июнида бўлиб ўтган.
Жиноят ишлари бўйича Хўжайли туман суди раиси Ибрайим Алланиязов иштирокида кўриб чиқилган суд ҳужжатларига кўра, 31 ёшли фуқаро Ф.Ҳ. 2020 йилнинг декабрь ойидан 2021 йилнинг 31 июлига қадар Қорақалпоғистоннинг Хўжайли туманидаги хонадонлардан бирида расмий никоҳдан ўтмаган турмуш ўртоғи А.А.билан яшаб келган. Аёл Россия Федерациясига ишлаш мақсадида кетган эрини уйга қайтариш ва рашк сабабли ўзининг ғайриқонуний режасини қўллашга киришган. У икки нафар вояга етмаган — 5 ёшли Ш.Ҳ. ҳамда 3 ёшли А.Ҳ.ларни ҳар хил сўзлар билан ҳақоратлаб, қўрқитиб, ожиз аҳволдалигини била туриб, жисмоний ва руҳий азоб бериб, муттасил равишда дўппослаб келган. Ф.Ҳ.ўзининг бу хатти-ҳаракатларини қўл телефони орқали видеотасвирга тушириб, Россия Федерациясида ишлаб юрган турмуш ўртоғи А.А.га жўнатган.
Шундан сўнг Ф.Ҳ.нинг бу хатти-ҳаракатлари акс этган видеотасвирлар «Дарё» интернет-нашри ва қатор турли ижтимоий тармоқларда тарқалгач, ҳуқуқ-тартибот идоралари томонидан тезкор ҳаракатлар бошланган.
Ҳолат юзасидан олиб борилган комплекс суд-психиатрия ва психология экспертизаси хулосасига кўра, ижтимоий хавфли қилмиш натижасида руҳий ҳолатида ўзгариш бўлгани боис 3 ёшли қизалоқ А.Ҳ. онасининг фақатгина урганини эслай олган. 5 ёшли қизалоқ Ш.Ҳ.да эса қўрқувчанлик, йиғлоқилик, тунда уйқу ҳолатида сапчиб туриб, таг остини намлаб қўйиш белгилари шакллангани баён қилинган.
«Ф.Ҳ. ўзининг бу ғайриқонуний ҳаракатлари билан Ўзбекистон Республикаси Жиноят кодексининг 110-моддаси 2-қисми ‘а’, ва ‘в’ бандлари (вояга етмаган шахсни, ожиз аҳволдалиги айбдорга аён бўлган шахсни қийнаш)да назарда тутилган жиноятни қасддан содир қилган. Судланувчи ўз айбига иқрорлик билдириб, бу хатти-ҳаракатларини фарзандларининг отасидан қаттиқ рашк қилгани ва уни хориждан қайтариш учун қизларини сўкиб, ҳақоратлаб, уриб турган ҳолатларини видеотасвирга олиб жўнатгани, қилмишидан чин дилдан пушаймонлиги, қизларисиз яшай олмаслигини билдирди», — дейилган суд ҳужжатида.
Маълум бўлишича, айбдор суд ҳукми эълон қилингунга қадар ўз фарзандларига нисбатан қилган ғайриқонуний хатти-ҳаракатлари сабабли қамоқда ушланган. У судда қамоқда ўтирган вақти давомида фарзанд, уй, озодлик қадрини тушуниб етганини билдириб, ўзига қамоқ жазоси билан боғлиқ бўлмаган жазо тайинланишини, оиласи, фарзандлари бағрига қайтаришни сўраган.
Суд унга нисбатан Жиноят кодексининг 110-моддаси 2-қисми «а», ва «в» бандлари (вояга етмаган шахсни, ожиз аҳволдалиги айбдорга аён бўлган шахсни қийнаш)ни қўллаб, уч йил муддатга озодликдан чеклаш жазосини тайинлаган.
Изоҳ (0)