Маданият жамғармаси таниқли америкалик хонанда Женнифер Лопеснинг 7 августда ўтказилиши кутилаётган Тошкентдаги концерти қайси маблағлар ҳисобига ташкил этилаётгани маълум қилди.
Жамғарма раиси биринчи ўринбосари Элмурод Нажимовнинг 16 июнь куни АОКАда бўлиб ўтган матбуот анжуманида билдиришича, Тошкентдаги концерт Up All Night — Live in 2025 турнеси доирасида ўтказилади. 7 август куни бўлиб ўтадиган тадбирга давлат бюджети маблағлари жалб этилмаган — барча харажатлар хусусий тадбиркорлар томонидан қопланмоқда.
Таъкидланишича, концертни ташкил этишда Маданият жамғармаси ва қатор ҳамкор ташкилотлар иштирок этмоқда. Бунда креатив туризмни ривожлантириш ва Ўзбекистонни халқаро санъат майдонига чиқариш мақсад қилинган.
“Женнифер Лопеснинг Ўзбекистонга ташриф буюриши билан боғлиқ барча харажатлар давлатдан бир тийин ҳам маблағ олинмасдан амалга ошириляпти. Тошкентдаги тадбирлар ташкиллаштирадиган ҳамкор фирмалар билан биргаликда Маданият ва санъатни ривожлантириш жамғармаси томонидан тадбир ташкиллаштирилмоқда. Лопеснинг Тошкентга келиб-кетиши, гонорари, барча харажатлари тадбиркорлар томонидан амалга оширилади, дея таъкидлади жамғарма вакили.
Тадбир “Бунёдкор” стадионида ўтказилади. Элмурод Нажимовнинг қайд этишича, бу шу вақтга қадар ушбу стадионда бу даражадаги катта тадбирлар ўтказилмаган. Халқаро майдонга шундай тадбирларни ўтказиб бера олишимизни кўрсатиб беролсак, жаҳоннинг бошқа юлдузларининг ҳам Ўзбекистонга келиб концерт-шоуларини ўтказиши даражаси ортади.
Жамғарма вакилларининг айтишича, стадионнинг ҳолати текширувдан ўтказилган, концерт ўтказиш учун барча техник талабларга жавоб беради.
Женнифер Лопеснинг Тошкентдаги концертига чипталарнинг 40 фоизини 35 дан ортиқ давлат фуқаролари сотиб олди. Буюртмаларнинг асосий қисми МДҲ ва Марказий Осиё давлатлари: Қозоғистон, Россия, Қирғизистон, Тожикистон, шунингдек, МДҲдан ташқари давлатлар, жумладан, АҚШ, Буюк Британия, Германия, Япония, БАА, Жанубий Корея, Канада ва Саудия Арабистонига тўғри келади.
Маданият жамғармасига кўра, хорижий томошабинларнинг бундай оқими нафақат имижга, балки мамлакат иқтисодиётига ҳам ижобий таъсир кўрсатади.
Изоҳ (0)