2022 йилда хонанда ва актриса Женнифер Лопес 20 йил ўтиб, қайта Бен Афллек билан муносабатларини йўлга қўйгани ҳақидаги хабарлар хорижий ОАВнинг энг қизғин янгиликларидан бири бўлди. Ёшликдаги муҳаббатини қайтаришга уринган Бен ва Жен дабдабали тўй ҳам ўтказди, аммо уларнинг турмуши атиги икки йил давом этди.
2024 йилда эр-хотин ажрашиш учун ариза беришди, ажрим жараёни январь расман якунланди. Яқинда GQ журналига берган интервьюсида Аффлек нега Лопес билан ажралишга қарор қилгани ҳақида сўзлаб берди:
“Кўпчилик нашрлар бизнинг ажрим ҳақида турли сабаб ва изоҳларни келтириб ўтди, бироқ ҳақиқат барчангиз ўйлагандан ҳам оддий. Муносабатларда доим ҳам томонларнинг дунёқараши ва фикрлари бир-бирига тўғри келавермайди”, деди Бен.
Шунингдек, у янгиликларда таъкидланганидек, ажрим сабаби Женнифернинг машҳурликка бўлган муносабатида эмаслигини ҳам қўшимча қилди. Турли нашрлар Жей Лони ўзининг юлдузлик мақомига ҳаддан ташқари аҳамият беришини ҳамда ҳаётининг ҳар бир қадамини шоуга айлантираётгани ҳақида ёзган эди. Аффлек эса буни рад этди.
“Мен шунчаки шахсий ҳаётим билан боғлиқ маълумотларни оммага маълум қилишни истамайман, бу мен учун жуда ноқулай”, дея якунлади актёр.
Бен Аффлекнинг собиқ рафиқаси, актриса Женнифер Гарнердан уч нафар фарзанди бор. Миш-мишларга кўра, Беннинг Жей Ло билан ажрашишига Аффлекнинг собиқ рафиқаси билан ҳаддан ташқари илиқ муносабати сақланиб қолгани сабаб бўлиши мумкин. Актёр Гарнер билан тез-тез кўришиб туриши ҳамда Жей Ло билан никоҳда бўлган вақтда унинг елкасига қўлини қўйиб ўтирган суратларнинг тарқалиши оилавий низоларга сабаб бўлгани тахмин қилинмоқда.
Бундан ташқари, интервью давомида Бен собиқ рафиқаси Женнифер Гарнерни мақтади:
“Женнифердек ажойиб ҳамроҳим борлигидан жуда хурсандман. У фарзандларим онаси ва ажойиб инсон. Ҳозирда Гарнер билан яхши муносабатдаман”, деди у.
Юлдузли жуфтлик муносабатларининг тарихи 2002 йилга бориб тақалади, 2004 йилда улар никоҳдан ўтиши керак эди, аммо Лопес тўйни бир неча кун қолганда тўхтатади. Орадан қарийб йигирма йил ўтиб — 2021 йил июль ойида Лопес ва Аффлек яна бирга эканини тасдиқлади. 2022 йил 16 июлда эса жуфтлик муносабатларини расман қонунийлаштирди.
Изоҳ (0)