Дунёга машҳур романтик балладалар ижрочиси қўшиқчи Шер, ёши катта бўлишига қарамай, фаоллик ва машҳурлик чўққисида. 76 ёшда хонанда ўзининг бренди остида янги атирлар коллекциясини чиқарди. Шер учун неча ёшга киришнинг аҳамияти йўқ, муҳими ҳаракатдан тўхтамасликдир, деб ёзади AdMe.
2022 йил сентябрь ойида Парижда бўлиб ўтган мода уйларининг сўнгги кўргазмасида (Paris Fashion week 2022) Шер кутилмаганда Balmain бренди либосида пайдо бўлди. Хонанда Balmain директори Оливье Рустен билан подиумда кўриниш берди ва профессионал моделларни ортда қолдирди.
Барчанинг ҳайратига Шернинг костюми сабаб бўлди — ҳайкалсимон елкалар ва рок-н-ролл услубидаги ҳашаматли комбинезон. Теридан тикилган этиклар ва ёрқин кумуш ранг либосдан яратилган образ барчанинг эътиборини ўзига қаратишга мажбур қилди. Шернинг ўзи шоудан кейин саҳнада ажойиб вақт ўтказганини ва шоунинг ўзи эса энг яхши мода намойиши бўлганини айтиб ўтди.
Албатта, генетика ва қимматбаҳо пластик жарроҳлик Шернинг ташқи кўринишида катта рол ўйнайди, аммо юлдузнинг арсеналида билиб қўйиш керак бўлган амалий усуллар ҳам мавжуд.
Зарарли одатлардан воз кечиш. Шер бошқа кўплаб машҳурлар (масалан, Женнифер Лопес) сингари барча васвасалардан ўзини қатъий тияди. Шернинг таъкидлашича, ҳар қандай ёмон одатлар терининг ранги, тузилиши ва эластиклигига салбий таъсир қилади ва, албатта, ажинлар пайдо бўлишига олиб келади. Йиллар давомида эса бу таъсир фақат жиддийлашади.
Тўғри овқатланиш. Машҳур қўшиқчи бутун фаолияти давомида парҳезга риоя қилади. Айнан бу унга нозик қоматни (76 ёшида 170 см баландликда 61 килограмм) сақлашга имкон беради, шунингдек, организмни ортиқча ёғ ва углеводлардан халос қилади. Қолаверса, Шер умуман гўшт истеъмол қилмайди, пишлоқ ва сутни қатъий чеклаган, лекин баъзида у ўзига десерт ва ширинликлар, айниқса, шоколадга рухсат беради.
Спорт эса ҳаёт тарзининг бир қисмига айланган. Хонанда 80 ёшга яқинлашиб қолган бўлса ҳам ҳафтасига 5 марта кардио машғулотлари билан шуғулланишда давом этмоқда. Шернинг айтишича, унинг мураббийи фитнес ҳақида гап кетганда, унинг ёшига аҳамият бермайди. Спорт залидаги бундай интизом унга концерт гастроллари, суратга олиш ва мода саёҳатларига мукаммал даражада бардош беришга имкон беради.
Ўз устида ишлаш ва доимий ривожланиш. Шер ўзининг туғма меҳнаткашлигини сўнмас гўзаллигининг асосий омили деб билади. Унинг таъкидлашича, доимий фаолият унинг ҳаётини маъно билан тўлдиради, депрессияга қарши курашиш ва мулоқот қилиш завқланишга ёрдам беради. Бу стресснинг саломатлик ва ташқи кўринишга салбий таъсирини сезиларли даражада камайтиради.
Бироқ шуни таъкидлаш керакки, машҳур хонанда кўплаб гўзаллик муолажаларини, масалан, сочларни бўяшни эътиборсиз қолдирмайди. У ҳеч қачон кул ранг сочлар билан омма олдида кўринмаган ва ўзи ҳам сочларининг оқаришига ҳеч қачон йўл қўймайди. Кўриб турганингиздек, мураккаб технологиялар йўқ, ушбу рецептдан хонандалар ҳам, оддий одамлар ҳам ҳаётида фойдаланиши мумкин.
Изоҳ (0)