Россиянинг Ленинград вилоятида 1 июнь куни ўзбекистонлик қурувчининг бошига цемент тўлдирилган челак ташлаб юборилди. Ўзбекистон фуқароси олган жароҳати сабабли вафот этди. Бу ҳақда 78.ru хабар берди.
Ҳодиса Всеволожск тумани “Невская долина” кўп қаватли уйи қурилишида содир бўлган. Полицияга ишчининг бошига ғишт тушгани ҳақида хабар келиб тушган. Воқеа гувоҳи бўлган қўриқчи 34 ёшли Ўзбекистон фуқароси бошига цемент қоришмаси қолдиқлари бўлган металл челак тушганини айтган. Шундан сўнг ўзбекистонлик эркак тан жароҳатлари билан шифохонага олиб кетилган.
Видеокузатув камераларига соат 11:47 да номаълум шахс қурилаётган уйнинг олтинчи қаватидаги деразадан қарагани, кейин қўлини чиқариб, эҳтимол, челакни пастга ташлагани акс этган. Ўзбекистон фуқароси бир неча соатдан сўнг шифохонада вафот этган.
Ленинград вилояти Тергов қўмитасига кўра, хавфсизлик қоидаларини бузиш ҳолати бўйича жиноий иш қўзғатилган.
Ҳозирда воқеа тафсилотлари, шунингдек, унинг сабаб ва шароитларини аниқлашга қаратилган тергов ҳаракатлари олиб борилмоқда, дейилади идора хабарида.
Тергов давомида қурилиш жараёнининг хавфсизлигини таъминлаш вазифаси юклатилган ходимлар аниқланади.
Изоҳ (0)