Ғазода сўнгги 24 соат ичида Исроил армиясининг бутун ҳудуд бўйлаб уюштирган ҳужумлари оқибатида камида 71 киши ҳалок бўлди. Исроилликлар босиб олинган Ғарбий Соҳил бўйлаб рейд ўтказиб, одамларни ҳибсга олди. Бу ҳақда Al Jazeera хабар берди.
Сўнгги 4 ҳафта ичида Исроил кучлари томонидан уюштирилган ҳужумларда жами 549 фаластинлик ҳалок бўлган, яна 4066 нафари жароҳатланган. Исроил Ғазога қарши уруш бошлаганидан бери қурбонлар сони 56 259 кишидан ошган, 132 458 киши жароҳат олган.
Исроил қўшинлари босиб олинган Ғарбий Соҳил бўйлаб ҳибсга олиш ҳаракатларни олиб бормоқда.
Исроил ҳарбийлари сўнгги 24 соат ичида босиб олинган Ғарбий Соҳил бўйлаб бир нечта ҳудудларга бостириб кирган, жумладан: Қалқиля, Аззун шаҳарларида, Қабатия, Женин, Кафр Малек ва Рамаллоҳнинг шарқида ҳамда Наблус ғарбидаги Тал қишлоғида рейдлар ўтказилиб, одамлар ҳибсга олинган.
Ғарбий соҳилдаги Кафр Малек қишлоғида 3 нафар фаластинлик 5 нафар исроиллик кўчманчи томонидан ўлдирилган эди. Исроил полицияси 25 июнь куни қотилликда гумонланганларни полиция бўлимига олиб кетган. Бироқ уларнинг айби йўқлигини айтиб, қўйиб юборилган.
Бирлашган Араб Амирликлари 26 июнь куни баёнот бериб, юқоридаги ҳужумни қоралаган ва Исроил ҳукуматини “тўлиқ масъулиятни ўз зиммасига олишга, ушбу душманона амалиётларни тўхтатишга ва айбдорларни жавобгарликка тортишга” чақирган.
Изоҳ (0)