Муниса Ризаева Instagram’даги саҳифаси орқали мухлисларига ота-онасининг ҳолидан хабар олгани ҳамда улар билан нималар ҳақида суҳбатлашгани акс этган видеосини намойиш этди. Хонанданинг онаси Дилором Бўрихўжаеванинг айтишича, у туғилганидаёқ хонанда бўлишини айтишган.
Онасининг сўзларига кўра, ҳомиладорлигининг саккизинчи ойида кечаси тўсатдан қон кетган. Турмуш ўртоғи тез ёрдам чақирган ва улар шошилинч тарзда шифохонага йўл олган. Шифохонага етиб келишгач, Ғулом исмли яқин танишлари профессорни чақиртиради. Профессор эрталаб соат 6:00 ларда келиб, ҳомилани текширади ва “бола ўлган, юрак уриши йўқ” дея ташхис қўяди.
Бироқ Мунисанинг онаси бу ташхисга қарамай, “бола ўлган бўлса ҳам, уни ўзим туғаман”, деган. Шундан сўнг у бутун кун шифокорлар назоратида уколлар ва дори-дармонлар ёрдамида туғуруққа тайёрланган. Кечга яқин эса, у қизини соғ-саломат дунёга келтирган.
Сен туғилаётганингда бақириб йиғлай бошлагансан. Менинг икки дугонам Феруза ва Лола бахтимга ўша куни навбатчи экан. Уларнинг биринчи айтган гаплари шу бўлди: “Дилка, қизинг қўшиқчи бўлади”. Мен эса “Бўлиши мумкин эмас” дедим. Улар эса “Кўрасан, қизинг қўшиқчи бўлади, ҳали туғилиб улгурмасидан бор овозда бақиряпти” деди. Ўша пайтда бу мен учун ҳақиқий мўжиза эди. Ҳали ҳам шундай бўлиши мумкинлигига ишонгим келмайди, дейди актрисанинг онаси.
Муниса Ризаеванинг санъатга бўлган қизиқиши болаликдан бошланган. Онаси уни ёшлигида турли тўгараклар ва маданий тадбирларга олиб борар, бу эса қизнинг истеъдодини ривожлантиришга ёрдам берган. Бироқ қўшиқчи бўлиш истаги пайдо бўлганда, отаси бу қарорга осонлик билан рози бўлмаган.
Қўшиқчи бўлмоқчи эканингни айтганингда иккита дўстимни таклиф қилдим. Уларнинг иккаласи ҳам халқ артистларининг фарзандлари эди. Улар сени санъаткор бўлишингга мени кўндиришган. Ўшанда нима деганим эсингдами? “Муниса, ноталарни биласанми?”, Сен “йўқ” деб жавоб бергансан. Мен сендан бирор арияни ижро эта оласанми деб сўраганимда сен бунга ҳам “йўқ” деб жавоб бергансан. Шунда мен қуйидагича шарт қўйдим: Агар сен қўшиқчилик билан жиддий шуғулланмоқчи бўлсанг, ўқишинг керак. Шундан сўнг мен исталган вақт ўқишинг учун пул тўлашга тайёрлигимни айтдим, дейди актрисанинг отаси.
Шундан сўнг хонанда консерваторияга киради ва ўқишини Лондонда давом эттиради.
Изоҳ (0)