Эроннинг Исроилга уюштирган ракета ҳужумлари натижасида Давид Бен-Гурион университети олтита лабораторияси бутунлай йўқ қилинди, яна тўққизтаси жиддий шикастланди. Бу ҳақда Times of Israel нашри хабар бермоқда.
“19 июнь куни Эрон ракетаси “Сорока” тиббиёт маркази ҳудудига тушиши оқибатида Бен-Гурион университетининг олтита илмий-тадқиқот лабораторияси вайрон этилди, яна тўққизтаси шикастланди”, дейилади хабарда.
Таъкидланишича, лабораторияларга берилган зарбалар Исроилнинг тиббиёт ва биология соҳасидаги кўп йиллик илмий лойиҳаларини деярли йўққа чиқарган.
Тиббиёт фанлари факультетининг ўқув хоналари, амалиёт лабораториялари ва анатомия бўлими ҳам жиддий зарар кўрган. Бундан ташқари, университетнинг асосий ҳудудидаги яна 30 та турли бинога ҳам шикаст етган.
Университет раҳбарияти ҳали ҳам зарар кўламини аниқламоқда: дастлабки баҳоларга кўра, бу “ўнлаб, балки юзлаб миллион шекелни” ташкил этади (жорий курс бўйича 10 миллион шекел 2,93 миллион АҚШ долларига тенг).
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ Президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)