Mayli Sayrus sahnadan qo‘rqqani uchun davolanganini tan oldi. Qo‘shiqchi The New York Times gazetasiga bergan intervyusida fobiyani yengishga EMDR (ko‘z harakatlari orqali desensitizatsiya va qayta ishlash) usuli yordam berganini aytdi.
EMDR — posttravmatik stress buzilishlarini davolash uchun ishlab chiqilgan psixoterapiya usulidir. U miyaning o‘tmishda boshdan kechirgan salbiy tajribalari va travmatik voqealarni hozirgi vaqtda qayta ishlashga asoslangan.
Sayrus o‘zining davolanishi qanday kechganini tasvirlab berdi. Psixoterapevt qo‘shiqchini gipnoz holatiga tushirgan, so‘ngra undan o‘zini poyezdda o‘tirgandek tasavvur qilishni va xuddi kino ko‘rayotgandek o‘zini kuzatishni so‘ragan. Shu paytda Sayrus sahnada uni qamrab oladigan xavotir tuyg‘usini tasvirlashi kerak edi. “Men shunchaki ular meni juda yaxshi ko‘rishlarini xohlayman”, deb javob berdi qo‘shiqchi.
Sayrus oxir-oqibat o‘zini Montanadagi tog‘ cho‘qqisida tasavvur qilganini va u yerda “ko‘p jarohatlarni boshdan kechirganini” eslaydi. “Men u yerda o‘zim yaxshi ko‘rgan paltoda kichkina qizaloq bo‘lib turganimni ko‘rdim”, deydi qo‘shiqchi. Uning so‘zlariga ko‘ra, atrofida “unga xotirjamlik va muhabbat keltirgan odamlar” bo‘lgan. Yonida buvisi, onasi, sevgilisi va bir necha yil oldin vafot etgan iti bor edi. Ularning barchasi “qo‘l ushlashib turishardi”.
“Men shunday qilib bu holatdan chiqdim va shundan keyin hech qachon sahnadan qo‘rqmadim”, deb tan oldi Sayrus. U bu davolash usuli “uning hayotini qutqarganini” qo‘shimcha qildi.
Izoh (0)