Ёзги трансфер ойнаси якунига қадар “Манчестер Сити”ни бир нечта футболчилар тарк этиши мумкин. Хусусан, испаниялик ярим ҳимоячи Нико Гонсалес “шаҳарликлар” сафида кам ўйин амалиётига эга бўлаётганидан норози бўлиб, бошқа жамоага ўтмоқчи. Бу ҳақда Goal нашри хабар бермоқда.
Манбага кўра, 23 ёшли футболчининг агенти аллақачон унга янги клуб излаш ишларини бошлаган. Гонсалесга Европанинг бир нечта клублари ҳамда Саудия Арабистонининг ҳозирча номи ошкор этилмаган жамоасидан таклифлар мавжуд. Агар музокаралар муваффақиятли якунланса, у ёзги трансфер ойнаси давомида “шаҳарликлар” сафини тарк этади.
Эслатиб ўтамиз, Нико Гонсалес жорий йилнинг февраль ойида Португалиянинг “Порту” клубидан “Манчестер Сити”га 60 миллион евро эвазига трансфер қилинган эди.
Шунга қарамай, футболчи жамоада етарли ўйин амалиётига эга бўла олмади. Хусусан, у Клублар ўртасидаги Жаҳон чемпионатида атиги бир ўйинда майдонга тушган. Шу сабабли испаниялик ярим ҳимоячи жамоани тарк этиш ниятида.
Маълумот учун, Гонсалес “Сити” сафида ҳозиргача 12 та учрашувда майдонга тушиб, 2 та гол муаллифига айланган. Унинг клуб билан шартномаси 2029 йил ёзига қадар амал қилади. Transfermarkt портали футболчининг бозор қийматини 40 миллион еврога баҳолаган.
Изоҳ (0)