Қуёшли кунлар, 40 даражага яқинлашган ҳаво ҳарорати — бундай жазирама кунларда кўчада ҳаракатланишнинг ўзи мушкул, айниқса, жамоат транспортида. Пойтахтнинг асосий ҳаракат воситаларидан бири бўлган автобусларда совитиш тизими ишлаяптими ёки йўқ? “Дарё” журналисти аҳоли фикрини ўрганди.
Аҳоли орасида ўтказилган сўровномага кўра, йўловчилардан турлича жавоблар олинди. Баъзилар автобуслардаги кондиционер ишлаётганидан мамнун бўлса, бошқалар совитиш тизимининг умуман йўқлигидан норози бўлди.
Негадир 100-рақамли автобусда совитиш тизими ишламайди. Ҳайдовчилар батарея қувватини баҳона қилади. Кейин ҳайдовчилар жуда ёмон ҳайдайди. Уларга машина ҳайдаш маданиятини ўргатиш керак.
Биз чиққан автобусда кондиционер ёқилмаганди. Жуда иссиқлигидан манзилга етмасдан тушиб қолдик.
Йўловчининг айтишича, автобус салонидаги дим ҳаво кексалар ва сурункали хасталиги бор кишилар учун хавфли бўлиши мумкин.
Автобусларнинг ҳаммасида ҳам кондиционер мавжуд эмас. Масалан, Чирчиққа борадиган 101-сонли автобусда кондиционер йўқ. 40-50 даража иссиқда совитиш тизими ишламайдиган автобусда ёши катталарда юрак сиқилиши ва бошқа нохуш ҳолатлар юзага келиши мумкин.
Шунингдек, айрим йўловчилар автобус салонидаги ёқимсиз ҳидлардан ҳам норозилик билдирди.
38-сонли автобусда кондиционер йўқ, 115-да эса яхши. Баъзи автобуслардаги ҳид жуда сассиқ, чидаб бўлмайди.
Аммо барча фикрлар салбий эмас. Сўровномада қатнашган бир қанча йўловчилар мавжуд шароитдан мамнунлигини айтди.
Автобусларда совитиш тизими жуда яхши ишлаяпти. Энди ёши катталарга иссиқ ҳам, совуқ ҳам унча тўғри келмайди.
Мен чиқадиган барча автобусларда совитиш тизими яхши. Эрталаб 08:00 дан 17:00 гача кондиционерни ёқади, кейин ўчириб қўяди.
Жазирама иссиқда жамоат транспортида совитиш тизимининг ишламаслиги оқибатида ҳар куни юзлаб, балки минглаб йўловчилар дим, тиқилинч ва ноқулай шароитда манзилларига етишга мажбур бўлмоқда. Автобус салонларидаги ҳаво танқислиги, юқори ҳарорат ва жиззаки муҳит эса нафақат ноқулайлик, балки соғлиқ учун ҳам жиддий хавф туғдириши мумкин.
Муаммонинг илдизи нимада? Нега барча автобуслар кондиционер билан жиҳозланмаган ёки мавжудлари ёқилмаяпти? Бу саволларга аниқлик киритиш мақсадида “Тошшаҳартрансхизмат” АЖга мурожаат қилдик.
Пойтахтимиз аҳолисига хизмат кўрсатиш учун бир кунда 1552 тага яқин автобус чиқариляпти. Ушбу автобуслардан 1400 тасида совитиш тизими мавжуд. Қолган автобусларимиз эса ишлаб чиқариш заводи томонидан кондиционер совитиш тизими билан жиҳозланмаган эски русумдаги транспортлар ҳисобланади.
Mercedes-Benz, САЗ ЛЕ 60 ҳамда MAN русумли автобусларнинг баъзи партиялари заводдан кондиционерсиз ишлаб чиқарилган. Шунинг учун ҳозирги пайтда пойтахтда ҳаракатланаётган ушбу русумдаги баъзи автобусларда совитиш тизими йўқ, дейди “Тошшаҳартрансхизмат” АЖ ахборот хизмати раҳбари Муслима Обидова.
“Тошшаҳартрансхизмат” АЖ берган расмий маълумотга кўра, ёзги мавсум кириб келиши муносабати билан автобусларда ҳар куни эрталаб соат 08:00 дан кечки 19:00 га қадар совитиш тизимлари ёқилган ҳолда ҳаракатланиши белгиланган.
Шунингдек, ташқаридаги ҳаво ҳароратидан қатъи назар, автобус салонида 26 даража ҳароратни сақлаб туриш белгиланган. Автобус ҳайдовчилари учун махсус бошқарув панели мавжуд бўлиб, у орқали салондаги ҳарорат кузатиб борилади. Агар совитиш тизими ёқилгач, салон ичидаги ҳарорат 26 даражага етган бўлса, айнан шу ҳароратни ушлаб туриш ҳайдовчидан талаб этилади.
Айрим автобусларда совитиш тизими йўқлиги йўловчиларимизга ноқулайлик туғдирди. Ёзнинг ўтган биринчи ойида 1062 ишонч рақамимиз орқали автобусларда кондиционер тизими ишламаслиги юзасидан 300 га яқин мурожаат келиб тушган. Ундан 100 таси ҳозир мурожаатларни ечиш жараёнида.
Совитиш тизими бўлмаган автобуслардан тушган мурожаатларни ҳозир ҳал қилишнинг имкони йўқ. Тез орада пойтахтга янги 200 та электробус етиб келиши кутилмоқда. Улар келиши билан кондиционери йўқ бўлган эски автобуслар тезда алмаштирилади, дейди Муслима Обидова.
Иссиқ ёз кунларида автобуслардаги совитиш тизими муаммоси энди оддий ноқулайлик эмас, балки жамоат транспортидан фойдаланиш сифатига салбий таъсир кўрсатаётган долзарб муаммога айланмоқда. Йўловчилар бу муаммо бартараф этилишини кутмоқда. Қанчалик тезкор чора кўрилиши эса энди масъулларнинг эътиборида.
Изоҳ (0)