Quyoshli kunlar, 40 darajaga yaqinlashgan havo harorati — bunday jazirama kunlarda ko‘chada harakatlanishning o‘zi mushkul, ayniqsa, jamoat transportida. Poytaxtning asosiy harakat vositalaridan biri bo‘lgan avtobuslarda sovitish tizimi ishlayaptimi yoki yo‘q? “Daryo” jurnalisti aholi fikrini o‘rgandi.
Aholi orasida o‘tkazilgan so‘rovnomaga ko‘ra, yo‘lovchilardan turlicha javoblar olindi. Ba’zilar avtobuslardagi konditsioner ishlayotganidan mamnun bo‘lsa, boshqalar sovitish tizimining umuman yo‘qligidan norozi bo‘ldi.
Negadir 100-raqamli avtobusda sovitish tizimi ishlamaydi. Haydovchilar batareya quvvatini bahona qiladi. Keyin haydovchilar juda yomon haydaydi. Ularga mashina haydash madaniyatini o‘rgatish kerak.
Biz chiqqan avtobusda konditsioner yoqilmagandi. Juda issiqligidan manzilga yetmasdan tushib qoldik.
Yo‘lovchining aytishicha, avtobus salonidagi dim havo keksalar va surunkali xastaligi bor kishilar uchun xavfli bo‘lishi mumkin.
Avtobuslarning hammasida ham konditsioner mavjud emas. Masalan, Chirchiqqa boradigan 101-sonli avtobusda konditsioner yo‘q. 40-50 daraja issiqda sovitish tizimi ishlamaydigan avtobusda yoshi kattalarda yurak siqilishi va boshqa noxush holatlar yuzaga kelishi mumkin.
Shuningdek, ayrim yo‘lovchilar avtobus salonidagi yoqimsiz hidlardan ham norozilik bildirdi.
38-sonli avtobusda konditsioner yo‘q, 115-da esa yaxshi. Ba’zi avtobuslardagi hid juda sassiq, chidab bo‘lmaydi.
Ammo barcha fikrlar salbiy emas. So‘rovnomada qatnashgan bir qancha yo‘lovchilar mavjud sharoitdan mamnunligini aytdi.
Avtobuslarda sovitish tizimi juda yaxshi ishlayapti. Endi yoshi kattalarga issiq ham, sovuq ham uncha to‘g‘ri kelmaydi.
Men chiqadigan barcha avtobuslarda sovitish tizimi yaxshi. Ertalab 08:00 dan 17:00 gacha konditsionerni yoqadi, keyin o‘chirib qo‘yadi.
Jazirama issiqda jamoat transportida sovitish tizimining ishlamasligi oqibatida har kuni yuzlab, balki minglab yo‘lovchilar dim, tiqilinch va noqulay sharoitda manzillariga yetishga majbur bo‘lmoqda. Avtobus salonlaridagi havo tanqisligi, yuqori harorat va jizzaki muhit esa nafaqat noqulaylik, balki sog‘liq uchun ham jiddiy xavf tug‘dirishi mumkin.
Muammoning ildizi nimada? Nega barcha avtobuslar konditsioner bilan jihozlanmagan yoki mavjudlari yoqilmayapti? Bu savollarga aniqlik kiritish maqsadida “Toshshahartransxizmat” AJga murojaat qildik.
Poytaxtimiz aholisiga xizmat ko‘rsatish uchun bir kunda 1552 taga yaqin avtobus chiqarilyapti. Ushbu avtobuslardan 1400 tasida sovitish tizimi mavjud. Qolgan avtobuslarimiz esa ishlab chiqarish zavodi tomonidan konditsioner sovitish tizimi bilan jihozlanmagan eski rusumdagi transportlar hisoblanadi.
Mercedes-Benz, SAZ LE 60 hamda MAN rusumli avtobuslarning ba’zi partiyalari zavoddan konditsionersiz ishlab chiqarilgan. Shuning uchun hozirgi paytda poytaxtda harakatlanayotgan ushbu rusumdagi ba’zi avtobuslarda sovitish tizimi yo‘q, deydi “Toshshahartransxizmat” AJ axborot xizmati rahbari Muslima Obidova.
“Toshshahartransxizmat” AJ bergan rasmiy ma’lumotga ko‘ra, yozgi mavsum kirib kelishi munosabati bilan avtobuslarda har kuni ertalab soat 08:00 dan kechki 19:00 ga qadar sovitish tizimlari yoqilgan holda harakatlanishi belgilangan.
Shuningdek, tashqaridagi havo haroratidan qat’i nazar, avtobus salonida 26 daraja haroratni saqlab turish belgilangan. Avtobus haydovchilari uchun maxsus boshqaruv paneli mavjud bo‘lib, u orqali salondagi harorat kuzatib boriladi. Agar sovitish tizimi yoqilgach, salon ichidagi harorat 26 darajaga yetgan bo‘lsa, aynan shu haroratni ushlab turish haydovchidan talab etiladi.
Ayrim avtobuslarda sovitish tizimi yo‘qligi yo‘lovchilarimizga noqulaylik tug‘dirdi. Yozning o‘tgan birinchi oyida 1062 ishonch raqamimiz orqali avtobuslarda konditsioner tizimi ishlamasligi yuzasidan 300 ga yaqin murojaat kelib tushgan. Undan 100 tasi hozir murojaatlarni yechish jarayonida.
Sovitish tizimi bo‘lmagan avtobuslardan tushgan murojaatlarni hozir hal qilishning imkoni yo‘q. Tez orada poytaxtga yangi 200 ta elektrobus yetib kelishi kutilmoqda. Ular kelishi bilan konditsioneri yo‘q bo‘lgan eski avtobuslar tezda almashtiriladi, deydi Muslima Obidova.
Issiq yoz kunlarida avtobuslardagi sovitish tizimi muammosi endi oddiy noqulaylik emas, balki jamoat transportidan foydalanish sifatiga salbiy ta’sir ko‘rsatayotgan dolzarb muammoga aylanmoqda. Yo‘lovchilar bu muammo bartaraf etilishini kutmoqda. Qanchalik tezkor chora ko‘rilishi esa endi mas’ullarning e’tiborida.
Izoh (0)