Ҳаж-2025 мавсумида зиёратга борган ўзбекистонликларнинг 8 нафари Саудия Арабистонида вафот этган. Бу ҳақда “Дунё” ахборот агентлиги хабар берди.
Маълум қилинишича, Ўзбекистон ҳукумати томонидан барча зарур чора-тадбирлар кўрилишига қарамай, бу йилги ҳаж ибодати пайтида кузатилган жазирама натижасида ва сурункали касаллиги бўлган тўрт нафар ўзбекистонлик Саудия Арабистонида вафот этган.
Шунингдек, Ўзбекистон мусулмонлари идорасининг огоҳлантиришларига қарамай, ҳажга ноқонуний йўллар билан борган яна тўрт нафар фуқаро ушбу мамлакатда оламдан ўтган.
Бундан ташқари, ҳаж ибодати тугаганидан сўнг Бош консулхонага 40 нафардан зиёд зиёратчилар хорижга чиқиш паспортларини йўқотгани боис Ўзбекистонга қайтиш гувоҳномасини расмийлаштириш учун мурожаат қилган.
Хабарда айтилишича, жорий йилдаги ҳаж мавсуми давомида Ўзбекистондан 15 мингдан зиёд ҳожилар ҳаж амалларини тартибли ва намунали адо этишлари таъминланди. Ўзбекистонлик ҳожиларнинг Саудия Арабистонига келиши 13 майдан бошланиб, 30 майга қадар давом этди. Ҳожиларнинг Ўзбекистонга қайтиб кетиши 12 июндан бошланди. Сўнгги ҳожилар 29 июнь куни ҳаво қатновлари орқали ватанга қайтди.
Тошкентнинг Яккасарой туманидаги Ракат масжиди имом-хатиби Раббимқул Муҳаммадиев ҳам Мадина шаҳрида вафот этганди. У 23 май куни Тошкент—Мадина йўналишида Тошкентнинг 38-гуруҳ зиёратчилари гуруҳ раҳбари сифатида йўлга чиққан. Парвоз давомида уйқуга кетган ва шу ҳолатда уйғонмаган.
Мадина халқаро аэропорти шифокорлари томонидан кўрилганда аҳволи ўта оғир, беҳуш бўлган, саволларга жавоб бермаган. Шундан сўнг клиникага жойлаштирилган. Бош мия қон айланиши ўткир бузилиши, мия ўзаги структуралари ўзгаришлари, бош мия шишиши ташхиси қўйилган. 24 майда операция ўтказилган, бироқ аҳволи оғирлигича сақланиб қолган ва 26 майда вафот этган.
Изоҳ (0)