Эмомали Раҳмон Тожикистон президентлигига қандай келган?

Ўзбекистоннинг биринчи мудофаа вазири, генерал-полковник Рустам Аҳмедов AlterEgo лойиҳасига берган интервьюсида Тожикистондаги фуқаролар уруши йилларидаги ҳарбий-сиёсий жараёнлар, Имомали Раҳмоннинг президентликка қандай келгани ҳақида гапириб берди.

 

Унинг айтишича, 1992-1997 йилларда Тожикистонда юз берган фуқаролар уруши давомида президент Ислом Каримов топшириғига биноан ҳарбий техникани етказиб бериш, авиация билан таъминлаш, жанговар кучларни мувофиқлаштириш ишларига бош-қош бўлган.

Бу 1992 йилнинг февраль ойи эди. Мени президент чақириб, “Ризвон ўзини Бадахшоннинг хўжайини, ўзини қўмондон деб эълон қилибди”, деди. Айтишларича, у 8 мартда Душанбени эгаллайман, дея таҳдид қилган. Шунда мен, имконият беринг, қуруқликдаги ҳарбий техникаларни кўчираман дедим, деди у.

Унинг сўзларига кўра, ўша пайтда Тожикистоннинг стратегик жойларида исломий қуролли гуруҳлар жойлашиб олган. Ромит дараси ҳам шулар жумласидан бўлиб, у ерда қарши ҳарбий операциялар олиб борилган. Ўзбекистон томонидан техника ва зарур воситалар билан таъминлаш ишлари олиб борилган.

“Мен айтдим: сизлар жанг қилинглар, ғалаба қозонинглар. Мен фақат техника, авиация ва бошқа нарсалар билан таъминлайман”, дейди Аҳмедов.

Рустам Аҳмедов президент Каримов томонидан Тожикистонда сиёсий етакчиликка муносиб кадр топиш вазифаси ҳам юклатилганини айтаркан, Эмомали Раҳмонни президентликка қандай қилиб тавсия қилинганини ҳикоя қилиб берган.

“Раҳмонов ўша даврда Тангори туманидаги совхоз директори, Олий Кенгаш депутати бўлган. Убайдуллоев Кўлоб вилояти ижроия қўмитаси раисининг ўринбосари эди. Президент менга муносиб номзод топишни буюрди. Ўша пайтда “қонундаги ўғри”, Халқ фронтининг раҳбари Сангак Сафаров ҳамда гиёҳванд, жиноятчи Файзали Саидов мен билан алоқада эди. Чунки, ягона соғлом куч улар эди. Қолганлари террорчилар эди. Уларни ўтакетган ёввойилар дейишарди. Ижроия қўмитасида ишлаган Убайдуллоев биринчи шахс бўлишни истарди. Мен у ҳақда гапирганимда, Сангак менга “Оғайни, керак эмас”, деди. “Нега?”, деб сўрадим.

У “Сен бизга уруғлар ва макаронни текинга берардинг-ку (Макаронлар — автоматлар, уруғлар эса ўқлар назарда тутилмоқда), у ўшаларни сотарди, ўз одамларига сотарди”, деди. Шундай қилиб Убайдуллоев номзодликдан тушиб қолди. “Раҳмонов яхшироқ”, деди у.

“Менга Раҳмоновни олиб келинглар” дедим. Иккаласини ҳам фуфайкада олиб келишди. Кейин унга “Бўлди, Ленинободга борасизлар. Сессияга? Мен сени президентимизга Олий кенгаш раиси сифатида тавсия қиламан” дедим. Биз уларни Термизда чиройли қилиб кийинтирдик ва менинг самолётимга чиқариб, Ленинободга юбордим. Ленинободда уларни Зокир Алматов кутиб олди. Ўша ерда уни сайлаб қўйишди”, дейди генерал-полковник.