Тожикистон президенти Эмомали Раҳмон ижтимоий тармоқлардаги лайклар ва реакциялар учун жиноий жавобгарликни бекор қилувчи қонунни имзолади. Бу ҳақда президент матбуот хизмати хабар берди.
Бу ҳужжат расмийлар томонидан экстремистик ёки жамоат тартибига таҳдид солувчи деб топилган постларга лайк босганлик учун жиноий жавобгарликни бекор қилади. Эмомали Раҳмон 2018 йилда Жиноят кодексининг 179-моддасига ўзгартиришлар киритган эди. Унга кўра, интернетда террорчилик хусусиятидаги жиноятларга очиқча даъват қилиш ёки терроризмни оқлаш учун 10 йилдан 15 йилгача озодликдан маҳрум қилиш жазоси белгиланган.
Ҳозирда ушбу модда асосида ҳукм қилинган шахслар озод қилинадими, йўқми, номаълум. “Озодлик” билан суҳбатлашган адвокат Дилшод Жўраев бундай инсонларга суд ҳукмини қайта кўриб чиқиш бўйича илтимоснома киритишни маслаҳат беради.
Расмий маълумотларга кўра, Тожикистонда 1,5 мингдан ортиқ одам ҳукумат экстремистик деб ҳисоблаган мақолаларга лайк босгани ва шарҳлагани учун судланган. Кўпинча, ҳукумат томонидан мухолифатга алоқадор ёки уларга хайрихоҳ деб ҳисобланган шахслар ҳуқуқ-тартибот органлари нишонига айланган.
Изоҳ (0)