Германия 8 июнь куни мамлакат яқин келажакда кўпроқ бомбапаноҳ яратиш ниятида эканлигини маълум қилди. Бу ҳақда Deutsche Welle хабар берди.
Фуқаролик муҳофазаси ва табиий офатларга ёрдам бериш федерал бошқармаси (ББК) раҳбари Ралф Тиеслер 8 июнь куни бу ҳақда оммага эълон қилган.
ББК раҳбарининг сўзларига кўра, Германия ҳозирда урушга етарлича тайёр эмас. Россиянинг Украинага бостириб кириши бир қатор мамлакатларда, айниқса, Болтиқбўйи мамлакатлари, Польша ва Германияда Москва бир неча йил ичида НАТО ҳудудига ҳужум қилиши хавотирини уйғотган.
“Узоқ вақт давомида Германия урушга тайёргарлик кўрмаяпти, деган фикр кенг тарқалган эди. Энди ҳолат ўзгарди. Биз Европада кенг кўламли ҳужумкор уруш хавфи борлигидан хавотирдамиз” деди Тиеслер.
У хавфсизлик инфратузилмасини кенгайтириш ва модернизация қилиш учун миллиардлаб евролик харажат бўлишини айтган.
“Фуқаро муҳофазаси соҳасидаги вазифалар жуда улкан. Келгуси 4 йилда бизга камида 10 миллиард евро керак. Яқин ўн йилликда эса камида 30 миллиард”, дея қўшимча қилди Тиеслер.
Юқори хавфсизликка эга янги бункерларни қуриш кўп вақт ва маблағ талаб қилади. Тезроқ ва арзонроқ ечим сифатида у туннеллар, метро бекатлари, ерости автотураргоҳлари ва жамоат биноларининг ертўлаларини бомбапаноҳларга айлантиришни эълон қилган.
Лойиҳа бомбапаноҳларни барча зарур нарсалар билан, жумладан, озиқ-овқат, ҳожатхона ва ётоқлар билан таъминлашни назарда тутади. Кириш жойлари махсус белгилар билан белгиланиб, бошпаналар ҳақида мобил иловалар орқали маълумот олиш мумкин бўлади. Бошқарма бу йил ёзда батафсил концепцияни тақдим этишни режалаштирмоқда.
Изоҳ (0)