Россия президенти Владимир Путиннинг яширин бункерлари бор. Бу ҳақда СССР КГБ ва Россия Ташқи разведка хизматининг собиқ ходими Сергей Жирнов 25 январь куни Freedom телеканали эфирида гапирди.
Жирновнинг сўзларига кўра, Россия президенти хавфсизлиги учун бир нечта махфий бункерлар тайёрланган, бироқ бу объектларнинг ҳаммаси ҳам узоқ вақт қолишга мўлжалланмаган. Жирнов объектлардан бири тўғридан тўғри Иосиф Сталин даврида қурилиб, Кремл остида жойлашганини айтди. Ўша пайтда муҳандислар СССР раҳбари маъмуриятни жимгина тарк этиши учун алоҳида метро линиясини қурган, дейди у.
Россия Мудофаа вазирлигига тегишли яна бир махфий бункер — Раменки-43 ҳам Москвада жойлашгани таъкидланади.
“Бундан ташқари, барча махсус хизматларнинг бункерлари бор, КГБ ва Бош штабда ҳам бир нечта объектлар мавжуд. Аслида, махсус хизматларнинг қаерда резиденсияси бўлса, ўша ерда бункери бор. Савол шундаки, улар узоқ вақт давомида автоном ҳаётни таъминлаш учун қанчалик жиҳозланган ва чуқур? Бундай бункерлар унчалик кўп эмас”, — таъкидлади Жирнов ва яна бир бункер Владимир Путин учун махсус Ново-Огарёво қишлоғида жойлашган президент қароргоҳида қурилганини айтди.
2022 йил декабрь бошида Россиянинг “Собеседник” нашри президент Владимир Путин учун бутун Россия бўйлаб махфий бункерлар қурилгани ҳақида маълумот берган. Шунингдек, The Mirror нашри декабрь ойида Владимир Путин оммавий грипп тарқалгани сабабли яширин бункердалиги ҳақида хабар берган.
Изоҳ (0)