Афғонистоннинг Панжшир вилояти аҳолиси “Толибон” аёлларга қўйилган чекловларни кучайтирганини, хусусан, бурқа кийиш мажбурий этиб белгиланганини маълум қилди. Бу ҳақда Afghanistan International хабар берди.
Маълум қилинишича, ҳудудда бурқа кийилмаган тақдирда, аёлларнинг эркин юришига йўл қўйилмаяпти ва уларнинг ёнидаги одамлар ҳам ҳақорат ва зўравонликка дучор бўлмоқда.
Маҳаллий манбаларга кўра, вилоят бўйлаб янги назорат пунктлари ташкил этилган бўлиб, улар бурқа киймаган аёлларни нишонга олмоқда.
“Панжширда аёллар назорат пунктларида автомобиллардан туширилиб, бурқа киймагани учун ҳақорат қилинмоқда. Ҳатто бундай аёлларни ташиган ҳайдовчилар ҳам калтакланганига гувоҳ бўлдик”, деди вилоят аҳолиси вакилларидан бири.
Рохха туманида яшовчи бошқа бир гувоҳ ҳам сўнгги кунларда “Толибон” кийим-кечак талабларига амал қилмаган аёлларни тўхтатаётгани ва жамоатчиликни қўрқитаётганини тасдиқлаган. Аҳолининг айтишича, кийиниш бўйича рейдлар билан бирга, “Толибон” мобил телефонлардан фойдаланишни ҳам чеклашга уринмоқда. Эркаклар ҳам, аёллар ҳам смартфон олиб юрмаслик ҳақида огоҳлантирилган ва сўнгги кунларда бу огоҳлантиришлар қўпол тус олган.
“Биз Кобулга боришни режалаштирган эдик, аммо гуруҳимиздаги аёллар бурқа киймагани сабабли, улар тўлиқ ҳижобда бўлишига қарамай, йўлимизни тўсишди”, деди яна бир маҳаллий аҳоли вакили.
Маҳаллий манбалар “Толибон” бу янги чораларни 7 августдан бошлаб қўллай бошлаганини ва вазият кун сайин оғирлашаётганини айтмоқда. Панжширда кузатилган бу чекловлар яқинда Кобулга ҳам етиб келган — пойтахтда ҳаракат расмийлари “нотўғри ҳижоб” кийишда айбланган аёлларни ҳибсга олгани хабар қилинган.
Изоҳ (0)