Шавкат Мирзиёев 19 май куни “Ўзбекистон Республикаси билан Озарбайжон Республикаси ўртасида иттифоқчилик муносабатлари тўғрисидаги шартномани ратификация қилиш ҳақида”ги қонунни имзолади.
Ушбу қонун 2025 йил 25 февралда Қонунчилик палатаси томонидан қабул қилиниб, 30 апрелда Сенат томонидан маъқулланганди.
Шавкат Мирзиёев ва Илҳом Алиев Иттифоқчилик муносабатлари тўғрисидаги шартномани 2024 йил 23 августда Тошкентда имзолаганди. Ўшанда Озарбайжон президенти Ўзбекистонга давлат ташрифини амалга оширганди.
Шартнома ҳақида
Мазкур шартнома икки давлат мустақиллиги, суверенитети, ҳудудий яхлитлиги ва барқарор иқтисодий ривожланишини янада мустаҳкамлашга қаратилган давлатлараро муносабатларнинг янги босқичини шартномавий-ҳуқуқий жиҳатдан мустаҳкамлашни назарда тутади.
Шунингдек, шартномада томонларнинг бир-бирларига қарши қаратилган ҳеч қандай блоклар ёки иттифоқларда қатнашмаслик ҳамда томонлардан бирининг фикри бўйича икки давлатнинг стратегик шериклиги ва иттифоқчилик муносабатларига зарар етказадиган ҳар қандай ҳаракатларда иштирок этишдан сақланиш каби мажбуриятлари белгиланган.
Қонун билан мазкур шартноманинг ратификация қилиниши икки мамлакат ўртасидаги ўзаро ишонч, дўстона алоқалар ва стратегик шерикликни янада мустаҳкамлайди.
Изоҳ (0)