Ko‘ksaroy qarorgohida 23-avgust kuni O‘zbekistonga davlat tashrifini amalga oshirayotgan Ozarbayjon prezidenti Ilhom Aliyevni rasmiy kutib olish marosimi bo‘ldi. Bu haqda Prezident matbuot xizmati xabar berdi.
Ikki davlat bayroqlari bilan bezatilgan maydonda Ozarbayjon prezidenti sharafiga faxriy qorovul saf tortdi. Shavkat Mirziyoyev oliy martabali mehmonni kutib oldi va shohsupaga taklif qildi. O‘zbekiston va Ozarbayjon davlat madhiyalari yangradi.
Yetakchilar faxriy qorovul safi oldidan o‘tib, rasmiy delegatsiya a’zolarini qutladi.
Birgalikda suratga tushilgandan so‘ng davlat rahbarlarining tor doiradagi muzokaralari boshlandi.
Ozarbayjon prezidenti Ilhom Aliyev rafiqasi Mehribon Aliyeva hamrohligida 22-avgust kuni davlat tashrifi bilan O‘zbekistonga keldi. Ularni Toshkent xalqaro aeroportida bosh vazir Abdulla Aripov va boshqa rasmiylar kutib oldi.
Ozarbayjon prezidenti va birinchi xonimi Haydar Aliyev yodgorligi majmuasiga bordi. Ular yodgorlik poyiga gulchambar qo‘yib, atoqli davlat arbobi, mustaqil Ozarbayjonning asoschisi Haydar Aliyev xotirasiga hurmat bajo keltirdi. Oliy martabali mehmon “Yangi O‘zbekiston” bog‘ida ham bo‘lib, Mustaqillik monumenti poyiga gul qo‘ydi.
Tashrif dasturiga muvofiq, Toshkent shahrida O‘zbekiston va Ozarbayjon yetakchilari raisligida oliy darajadagi muzokaralar va Davlatlararo oliy kengashning birinchi majlisi o‘tkazilishi rejalashtirilgan. Sammit kun tartibidan O‘zbekiston—Ozarbayjon strategik sheriklik va ko‘p qirrali hamkorlik munosabatlarini yanada chuqurlashtirish va kengaytirish masalalari o‘rin olgan.
Ilhom Aliyev davlat tashrifi bilan O‘zbekistonga so‘nggi marta 2022-yilning iyunida kelgandi.
Izoh (0)