Janubiy Koreyaning Ilmiy-texnologiya instituti olimlari saraton hujayralarini sog‘lom holatga qaytarish imkonini beruvchi yangi usulni ishlab chiqdi. Bu yondashuv an’anaviy davolash usullaridan farqli o‘laroq, saraton hujayralarini yo‘q qilish o‘rniga ularni sog‘lom holatga qaytaradi. Bu haqda New Atlas xabar berdi.
Professor Kvang-Xyon Cho boshchiligidagi tadqiqotchilar normal hujayralarning gen tarmog‘ini raqamli model orqali tahlil qilib, hujayralarning mutatsiyaga uchrab, saratonli holatga o‘tish jarayonini aniqladilar. Ma’lum bo‘lishicha, MYB, HDAC2 va FOXA2 kabi “master-regulyatorlar” saratonli hujayralarni sog‘lom holatga qaytarishda asosiy rol o‘ynaydi. Ushbu molekulalarning genetik o‘sishini to‘xtatish orqali saraton hujayralari yo‘q qilinmasdan sog‘lom holatga qaytartildi. Tadqiqot molekulyar va hujayra darajasidagi tajribalar hamda hayvonlar ustida o‘tkazilgan sinovlar bilan tasdiqlandi.
Tadqiqotning ahamiyati
Ushbu yondashuv saraton hujayralarini yo‘q qilish o‘rniga ularni sog‘lom holatga qaytarishga qaratilgan bo‘lib, bu usul an’anaviy davolash usullariga qaraganda kamroq nojo‘ya ta’sirlar va yuqori samaradorlikka ega bo‘lishi mumkin. Garchi tadqiqot asosan yo‘g‘on ichak saratoni ustida olib borilgan bo‘lsa-da, bu usul boshqa saraton turlariga, masalan, ko‘krak, jigar va qon saratonlariga ham tatbiq etilishi mumkin. Yondashuv bemorning genetik va molekulyar profiliga asoslangan shaxsiylashtirilgan davolash imkoniyatlarini yaratadi.
Hozirda ushbu usul eksperimental bosqichda bo‘lib, klinik sinovlar orqali uning insonlarda xavfsizligi va samaradorligini aniqlash zarur. Tadqiqot natijalari Advanced Science jurnalida chop etilgan va BioRevert Inc. kompaniyasi tomonidan amaliyotga tatbiq etish uchun qo‘llanmoqda. Bu yondashuvning keng qo‘llanishi saratonni davolashda inqilobiy o‘zgarishlarga olib keladi.
Izoh (0)