Буюк Британиянинг The Economist журнали Economist's Safe Index 2015 деб номланган дунёдаги энг хавфсиз шаҳарлар рейтингини эълон қилди, деб хабар бермоқда «Вести Экономика».
Хавфсизлик даражасини баҳолашда ахборот хавфсизлиги, соғлиқ хавфсизлиги, инфратузилма ва шахсий хавфсизлик мезонларидан фойдаланилган. Рейтингдан жами 50 шаҳар ўрин олган бўлиб, эътиборингизга дастлабки йигирматаликни ҳавола этамиз.
20. Франкфурт (Германия)
Германиянинг бешинчи энг йирик шаҳри бўлмиш Франкфуртда 691 518 киши яшайди. Франкфурт жаҳоннинг йирик молиявий марказларидан бири, шунингдек бу ерда Европа Марказий банки жойлашган. Бу ерда яшаш учун энг яхши шароитлар жамланган.
19. Вашингтон (АҚШ)
АҚШ пойтахти анча бой шаҳар, шунингдек энг хавфсиз шаҳарлардан бири ҳисобланади. 2014 йилда жиноятчилик даражаси бироз ошганига қарамай умумий ҳолатда бу кўрсаткич анча паст ҳисобланади.
18. Лондон (Буюк Британия)
8,3 миллион аҳолига эга Лондон ахборот хавфсизлиги жиҳатидан Европанинг энг яхши шаҳри деб топилган. BBC маълумотларига кўра, 2014 йилда Буюк Британия пойтахтида ўғрилик даражаси сўнгги 40 йилдаги энг паст кўрсаткичга эга бўлган.
17. Лос Анжелес (АҚШ)
3,8 миллион аҳолига эга Лос Анжелес ахборот хавфсизлиги бўйича 6-ўринни эгаллаган − бу аксарият Европа шаҳарларидан юқори кўрсаткич.
16. Чикаго (АҚШ)
Ахборот хавфсизлиги бўйича 10-ўринни эгаллаган Чикагода жиноятчилик даражаси бироз юқорироқ, аммо шаҳар раҳбарияти шахсни аниқлаштириш тизимини йўлга қўйиб, бу борада ҳам ўсишга эришмоқчи.
15. Барселона (Испания)
Ўртаер денгизи соҳилида жойлашган Каталония пойтахти соғлиқ ва шахсий хавфсизлик бўйича энг яхши шаҳарлардан ҳисобланади. Барселонада полиция назорати тизими жуда ривожланган, атиги уч йилда шаҳарда жиноятчилик даражаси 32 фоизга камайган.
14. Монреаль (Канада)
4 миллион аҳолига Монреаль Канаданинг энг йирик шаҳри, шунингдек француз тилида сўзлашувчи аҳолига эга шаҳарлар ичида Париждан кейин иккинчи ўринда туради. Яшаш учун энг яхши шаҳарлар орасида Монреаль иккинчи ўринни эгаллаган.
13. Тайбей (Тайвань)
Тайвань пойтахти XXI асрда яшаш учун энг яхши шаҳарлардан бири ҳисобланади. 3 миллион аҳолига эга Тайбейда хавфсизлик муаммо ҳисобланмайди. Тезкор иқтисодий ўсиш маркази бўлган шаҳар ривожланган жамоат транспорти тизимига эга.
12. Сан Франциско (АҚШ)
Сан Франциско ахборот хавфсизлиги бўйича саккизинчи, инфратузлима хавфсизлиги бўйича ўнинчи ўринни эгаллаган.
11. Гонконг (Гонконг, Хитой)
Гонконг ахборот хавфсизлиги бўйича 4-ўринни эгаллаган бўлса-да, инфратузилма хавфсизлиги бўйича 40-ўринни эгаллаган. 7 миллион киши яшайдиган шаҳар аҳолисининг катта қисми харобаларда яшайди. Гонконгда йўл-транспорт ҳодисалари даражаси юқори, шунга қарамай шаҳар шахсий хавфсизлик бўйича 6-ўринни эгаллаган.
10. Нью-Йорк (АҚШ)
Нью-Йорк энг хавфсиз шаҳарлар ўнталигига кирган АҚШнинг ягона шаҳридир. Шаҳар соғлиқ хавфсизлиги бўйича иккинчи, ахборот хавфсизлиги бўйича учинчи ўринни эгаллаган. Шунга қарамай, Нью-Йоркда террорчилик ва киберуруш таҳдидлари мавжуд.
9. Мельбурн (Австралия)
4 миллион аҳолига эга Мельбурн инфратузилма ва шахсий хавфсизлик бўйича иккинчи ўринни эгаллаган. Турмуш даражаси бўйича эса 6-ўринда кўрсатилган.
8. Торонто (Канада)
Канаданинг аҳолиси энг кўп шаҳри бўлмиш Торонто хавфсизлик, тадбиркорлик, демократия, озиқ-овқат маҳсулотлари хавфсизлиги, уй-жой нархлари каби мезонлар бўйича етакчи ўринларда туради.
7. Цюрих (Швейцария)
Анча қиммат жамоат транспорти тизимига эга Цюрих хавфсизликнинг барча мезонлари бўйича юқори ўринларда туради.
6. Сидней (Австралия)
4,5 миллион аҳолига эга Сидней инфратузилма ва шахсий хавфсизлик бўйича ўнталикка кирса, ахборот хавфсизлиги бўйича 14, соғлиқ хавфсизлиги бўйича 17-ўринни эгаллаган. Шунга қарамай, Сидней кибержиноятлар даражаси бўйича дунёдаги энг юқори кўрсаткичлардан бирига эга.
5. Амстердам (Нидерландия)
820 минг аҳолига эга Амстердамнинг транспорт инфратузилмаси ажойиб ҳолатда. Велосипедлардан фойдаланиш даражаси юқорилиги шаҳарда ҳаво ифлосланиши даражаси пастлигини таъминлайди.
4. Стокгольм (Швеция)
Швеция пойтахти 909 минг аҳолига эга бўлиб, шахсий хавфсизлик бўйича кучли бешликка кирган Осиёдан ташқаридаги ягона шаҳар ҳисобланади.
3. Осака (Япония)
2,6 миллион аҳолига эга Осака хавфсизлик жиҳатидан ҳам, бойлик жиҳатидан ҳам юқори ўринларни эгаллаган. Жумладан, ялпи ички маҳсулот бўйича Осака иккинчи ўринда кўрсатилган.
2. Сингапур (Сингапур)
Сингапурда исталган турдаги жиноят учун қаттиқ жазолар белгилангани туфайли хавфсизлик бўйича энг яхши шаҳарлардан бири ҳисобланади.
1. Токио (Япония)
13,3 миллион аҳолига эга Япония пойтахти аҳоли зичлиги ўта юқорилигига ва зилзилалар тез-тез содир бўлиб туришига қарамай барча мезонлар бўйича етакчилик қилмоқда.
Изоҳ (0)