Тошкент вилоятида маданий мерос объектларини муҳофаза қилишга қаратилган назорат тадбирлари ўтказилганда 13 та ёдгорликка 342 миллиард сўм зарар етказилгани аниқланди. Бу ҳақда Бош прокуратура матбуот хизмати хабар берди.
Текширишда, хусусан, қуйидаги ноёб археология ёдгорликларига жиддий зиён етказилгани аниқланди:
- Оққўрғон туманида “Зокиртепа” (V–VII асрлар) ёдгорлигининг 1400 метр куб қисми терак экиш учун қазилиши натижасида 44,6 млрд;
- “Санчтепа” ёдгорлигининг 129 метр куб қисми йўл очиш учун текисланиб, 2,2 млрд;
- Паркент туманида “Қоровултепа” ёдгорлигининг 941 метр куб қисми ва “Ертепа” ёдгорлигининг 23 метр куб қисми бузилиб, жами 16,4 млрд;
- Пискент туманида “Мингтепа” (миллоддан аввалги V аср) ёдгорлигининг 7000 метр куб қисми бузилиб, 231 млрд;
- Оҳангарон туманида “Думгалактепа” (V–VI асрлар) ёдгорлигининг 658 метр куб қисми техника ёрдамида қазилиб, 21 млрд;
- Юқори Чирчиқ туманида “Хожакайтепа” (V–VII асрлар) ёдгорлигининг 43 метр куб қисми текисланиб, 1,3 млрд;
- Ўрта Чирчиқ туманида “Туябўғизтепа” ёдгорлигининг 54 метр куб қисми бузилиб, 1,7 млрд;
- Нурафшон шаҳрида “Чордаратепа” (III–VIII асрлар) ёдгорлигининг 38 метр қисми бузилиб, 1,2 млрд сўм.
Ҳолат юзасидан жиноят ишлари қўзғатилди ва дастлабки тергов ҳаракатлари олиб борилмоқда. Назорат тадбирлари эса давом эттирилади.
2025 йилнинг март ойида Самарқанд вилоятидаги ХIX-ХХ асрларга оид 3 та тарихий масжид бинолари бузиб ташлангани аниқланганди. Прокуратура органлари томонидан Маданий мерос агентлиги билан ҳамкорликда ўтказилган назорат тадбирлари давомида 3 та тарихий масжид бинолари бузиб ташланганидан ташқари, яна бир масжид тегишли рухсатсиз таъмирлангани оқибатида ёдгорликларга жами 46,8 миллиард сўмлик зарар етказилган.
Изоҳ (0)