Тошкент вилояти Оққўрғон тумани “Ҳосилдор” маҳалласида жойлашган “Шоҳрухия шаҳристон” археология ёдгорлигининг 16 гектар ер майдони қонунчилик талабларига зид равишда хусусий корхонага узоқ муддатга ижарага бериб юборилгани аниқланди. Бу ҳақда Бош прокуратура матбуот хизмати хабар берди.
Қайд этилишича, ушбу ёдгорлик ҳудудида ўзбошимчалик билан қазилма ишлари олиб борилиб, тарихий объектга 315 миллион сўм зарар етказилган.
Шунингдек, Оққўрғон туманида қурилиш ҳамда кадастр бўлими мансабдор шахслари “Ҳамид Олимжон” маҳалласида жойлашган “Қийритепа” археология ёдгорлигининг 0,4 гектар ер майдонида ноқонуний равишда сув иншоотининг қурилишига йўл қўйиши оқибатида тарихий объектига 180 миллион сўм зарар етказилган.
Текшириш натижасига кўра, тегишли мансабдор шахслар ва бошқаларга нисбатан жиноят иши қўзғатилиб, тергов ҳаракатлари олиб борилмоқда.
Маданий мерос объектларига зарар етказиш ҳолатлари
Март ўрталарида Самарқанд шаҳрида маданий мерос объектининг харобага айланишига сабабчи бўлган тадбиркор озодликдан маҳрум этилганди. Бухорода маданий мерос объекти бўлган “Ғозиён” мадрасаси ташландиқ ҳолатга келиб қолгани, Ўзбекистонда 6 мингдан зиёд маданий бойликнинг ноқонуний олиб кирилиши ва олиб чиқилиши тўхтатилгани, Тошкент вилоятида маданий мерос объектларига зарар етказган тадбиркорлар қамалгани тўғрисида хабар берилганди.
Изоҳ (0)