Покистоннинг Qasim Alishah foundation жамоат фонди раҳбари, Ўзбекистоннинг ушбу мамлакатдаги туристик бренди элчиси Қосим Алишоҳ бошчилигидаги делегация Наманганга келди. Бу ҳақда «Дарё»га вилоят ҳокимлиги ахборот хизмати хабар берди.
Вилоят ҳокимлигида уюштирилган қабул маросимида Наманганнинг зиёрат туризми борасидаги имкониятлари тақдим этилди. Вилоятда 282 та маданий мерос объэктлари мавжуд. Уларнинг 103 таси архитектура, 155 таси археология ёдгорликлари ва зиёратгоҳлар. Бир вақтнинг ўзида 1300 нафар сайёҳни қабул қилиш имкониятига эга 25 та меҳмонхона фаолият юритмоқда.
Ўтган йили Наманган вилоятига дунёнинг 82 мамлакатидан 9000 нафардан зиёд хорижий сайёҳ келди. Бу кўрсаткич 2017 йилга нисбатан 80 фоизга кўп.
—Покистонлик ва ўзбекистонликларнинг урф-одатлари, анъаналари ва қадриятларида бир-бирига ўхшаш жиҳатлар жуда кўп. Бу сайёҳларни ўзига чорлашда муҳим омил. Ахсикент археологик ёдгорлиги ва Султон Увайс Қараний зиёратгоҳини хорижда ҳам яхши билишади. Бугунги мулоқотда нафақат зиёрат туризми, балки экотуризм йўналишида ҳам ҳамкорлик қилишга келишиб олдик. Покистонга қайтгач, тарғибот ишларини янада фаол олиб борамиз ва жорий йилда юзлаб сайёҳларимизни Наманганга келишига эришамиз, — деди Қосим Алишоҳ.
Туризм ривожида оммавий ахборот воситалари ҳам муҳим ўрин эгаллайди. Покистонлик журналистлар Наманган вилоятининг маданий мерос объэктлари ҳақида видеоролик ва материаллар тайёрлаш, уларни ўз нашрлари, шунингдек, ижтимоий тармоқларда жойлаштириш орқали тарғиб қилиш ташаббуси билан чиқди.
Покистоннинг Dispatch News Desk нашри бош муҳаррири Оға Иқрор Ҳорунннинг айтишича, шу йил март ойида Наманганга Покистоннинг етакчи нашрлари ижодий ходимлари иштирокида инфотур ташкил этилади. Бу эса сайёҳлар оқими янада кўпайишига ижобий таъсир кўрсатади.
Покистонлик меҳмонлар Тўрақўрғон туманидаги Ахсикент археологик ёдгорлиги, Чортоқ туманидаги Султон Увайс Қараний, «Сутли булоқ» зиёратгоҳлари ва бошқа диққатга сазовор жойлар билан таништирилди.
Изоҳ (0)