2025 йил 14 май куни Сергели тумани Нилуфар кўчасида жойлашган омборхонада ёнғин содир бўлди. “Дарё” журналисти воқеа жойига бориб вазиятни ўрганди.
Омборхонада бўлган ишчиларнинг сўзларига кўра, ёнғин эрталаб чамаси 8:30 атрофида юзага келган. Ҳодиса тўғрисида мурожаат соат 11:03 да шаҳар ФВБга келиб тушган, сўнгра 12 та экипаж ёнғин жойига етиб борган ва ёнғинни бартараф этиш ишларига киришган.
Вазият айни пайтда тўлиқ назоратга олинган. Омборда спиртли маҳсулотлар, турли хил материаллар, четдан олиб келинган товарлар ҳамда тиббиётга оид воситалар сақланган. Бу эса ёнғиннинг тез тарқалишига ва алангаланиш даражасининг юқори бўлишига сабаб бўлган. Ёнғинни бартараф этиш ишларига ҳокимият томонидан 12 та асосий, 6 та махсус ва 6 та сув ташувчи ёнғин ўчириш техникаси жалб қилинган. Ёнғин содир бўлган вақтда ишчи-ходимлар зудлик билан ташқарига чиқишган, дейди Тошкент шаҳар ФВБ ахборот хизмати раҳбари.
Ёнғин жойидаги ҳарорат баландлиги ва маҳсулотларнинг ёниш хусусияти туфайли ўт ўчириш ишлари осон кечмади. Ёнғин соат 12:15 да қуршаб олинди ва соат 13:31 да батамом ўчирилди. Ушбу ёнғинни бартараф этиш ишлари фавқулодда вазиятлар вазири Б.Қудратхўжаев ва вазирнинг биринчи ўринбосари С.Зупаров бошчилигида амалга оширилди.
Ёнғин оқибатида атрофни қора тутун қоплаган, фуқаролар эса бундан хавотирда. Бу ёнғин экологик ва санитария хавфини ҳам юзага келтириши мумкин.
Бугун Сергели туманида ёнғин содир бўлган омбор хусусий ҳисобланади. У “божхона омбори” мақомига эга эмас. Яъни омбор четдан олиб келинган ва божхона назоратидан ўтказилмаган товарларни сақлаш учун мўлжалланмаганини маълум қиламиз, дейди Ҳусан Тангриев.
Тан жароҳати олганлар ҳақида маълумот келиб тушмаган. Ёнғиннинг келиб чиқиш сабаблари ҳамда етказилган моддий зарар миқдори ўрганилмоқда.
Изоҳ (0)