“Дарё” мухбири Сергелидаги портлашдан жабр кўрган аҳоли вакилларидан бири билан суҳбатлашди.
Суҳбат давомида мазкур ҳудудда яшовчи Ислом Мирзаев портлаш омборхона ҳудудидаги ёнғиндан кейин содир бўлганини айтди. Унинг сўзларига кўра, ёнғин бўлаётганини кўрган ва видеога ола бошлаган. 5-10 дақиқадан кейин эса портлаш содир бўлган.
“Ёнғин бўлаётганини кўрдим, деразадан видеога олаётган эдим, бирдан омбор портлаб кетди. Ўзимни ҳам орқага отиб юборди. Ёнғинни кўрганимдан кейин 5-10 дақиқадан кейин портлади”, — дейди у.
Яна бир портлашдан жабр кўрган аҳоли вакилининг таъкидлашича, масъуллар ҳамма зарарни қоплаб, ҳар қандай ёрдам беришга тайёр эканини айтган.
“Ойна синиб, менга ва 4 ёшли фарзандимга бир оз зарар етди. Масъуллар ҳамма зарарни қоплаб, ҳар қандай ёрдам беришга тайёр эканини айтишди”, — дейди фуқаро.
Сергели туманида кучли портлаш
Тошкент шаҳри Сергели туманидаги “Қурувчилар” даҳасида Inter Logistics МЧЖга қарашли омборхонада кучли портлаш ва ёнғин 28-сентябр куни тунда содир бўлганди. Ҳодиса оқибатида жабрланганларнинг умумий сони 163 кишини ташкил этди, бир нафар ўсмир ҳодиса оқибатида вафот этди. Мазкур ҳолат юзасидан ИИВ Тергов департаменти томонидан Жиноят кодексининг 259-моддаси (ёнғин хавфсизлиги қоидаларини бузиш) 2-қисми “а” ва ”б” бандлари билан жиноят иши қўзғатилди.
Содир бўлган фавқулодда ҳодисани ўрганиш, кўрилган талафотларни бартараф этиш ва жабрланганларга ёрдам кўрсатиш бўйича президент топшириғига кўра ҳукумат комиссияси тузилди. Унга кўра, комиссия фавқулодда ҳолат оқибатида зарар етказилган ҳар бир уй-жойни, жумладан, аҳоли хонадонлари, кўп қаватли уй-жойларнинг фасад қисмлари, дераза ва ромлари ҳамда таъмирталаб аҳволга келиб қолган бошқа бино ва иншоотларга етказилган зарарларни бартараф этиш бўйича моддий ёрдам кўрсатиш чораларини кўради.
Изоҳ (0)