Турк сериалларини севиб томоша қиладиган кўпчилик ҳеч бўлмаганда бир марта бўлса ҳам: “Қандай қилиб суратга олиш майдончасига бориш мумкин?” деган савол устида бош қотирган бўлиши шубҳасиз. Айниқса, севимли актёр ва актрисалари иштирокидаги саҳналарни ўз кўзи билан кўриш, улардан дастхат олиш ёки суратга тушиш имконияти ҳар қандай дизи мухлисини бефарқ қолдирмайди. Қуйида турк сериаллари энг кўп суратга олинадиган бешта жой ҳақида маълумот берамиз.
1. Истанбулнинг Кузгунжук маҳалласи
Бу ҳудудда сериаллар ва клиплар суратга олиш гуруҳларини тез-тез учратишимиз мумкин бўлган жойлардан. Ранг-баранг кўчалар режиссёрлар учун тайёр табиий декорацияга айланади.
Айнан шу ерда “Қалбим эшигини қоқ” сериалидаги Айфернинг гул дўкони ва “Севги изтироби” сериалидаги Камолнинг уйи жойлашган эди. Бу туман ўзининг тор кўчалари, рангли услубдаги уйлари билан машҳур. Маҳаллий аҳоли ҳам жуда меҳмондўст бўлиб, сайёҳларга йўл кўрсатишга ёрдам беришга тайёр.
2. Истанбулнинг Бейўғлу тумани
Бейўғлу шаҳар марказидаги йирик туман. Унда Галата минораси жойлашган бўлиб, у “Қўрғон сирлари”, “Тўрғай” ва “Севги изтироби” каби сериалларда кўп бора кўринган.
Янги ва эски бинолар уйғунлашуви туфайли бу жойдан режиссёрлар тез-тез фойдаланади. “Севги изтироби”даги машҳур “Отантик” кафеси ҳам шу ерда жойлашган.
3. Истанбул вилояти, Фатиҳ шаҳридаги Балат тумани
“Чуқур” сериали ишқибозлари бу туманга албатта кириб ўтишлари керак. Бу жой криминал драмалар учун айни муддао. Қадимий уйлар графити билан тўла тор кўчаларга туташиб кетган.
“Қизил шарбат” сериалининг айрим саҳналари шу ерда суратга олинган. 2025 йил сентябридан бошлаб ушбу лойиҳа актёрлари яна шу ерга қайтиши кутилмоқда.
4. Нарли қишлоғи, Мардин вилояти
Агар сиз “Олис шаҳар” ёки “Беқарор” сериалининг мухлиси бўлсангиз, бу жойни албатта кўришингиз керак. Қадимий Мардин вилоятининг гўзал бир қисми бўлган Нарли қишлоғи ўзининг бетакрор архитектураси билан ажралиб туради. Бу ернинг ўзи аллақачон диққатга сазовор жойга айланган. Агар актёрларни кўришга муваффақ бўлмасангиз ҳам, бу жойни зиёрат қилиш ўзига хос эстетик завқ бағишлайди.
2025 йил кузида Мардин яқинидаги бошқа шаҳарлар ҳам янги сериаллар учун суратга олиш майдончасига айланиши мумкин.
5. Истанбулнинг Бебек тумани
Рўйхатни Бебек тумани билан якунлаймиз. Бу нафақат машҳур суратга олиш маскани, балки кўплаб турк юлдузларининг яшаш жойи ҳамдир.
“Қизил шарбат” сериалининг асосий саҳналари айнан шу ерда, хусусан Унал оиласининг саройида суратга олинган. “Қўрғон сирлари” сериалининг ҳам кўплаб саҳналари шу ерда олинган.
Изоҳ (0)